Numri i viktimave në sulmin terrorist në objektet e kompanisë ajrore turke në Ankara është rritur në katër, sipas informacionit të fundit të publikuar nga presidenti turk, Recep Tayyip Erdoğan.
Erdoğan gjithashtu deklaroi se të paktën 14 persona janë plagosur. “Dënoj me forcë këtë sulm terrorist,” tha Erdoğan.
Presidenti rus, Vladimir Putin, dënoi sulmin dhe shprehu ngushëllime familjeve të të vrarëve, raportoi Anadolu.
Sipas raportimeve më të fundit të mediave turke, dy terroristë janë neutralizuar, ndërsa një sulmues i tretë thuhet se mban punëtorë si pengje brenda objektit. Situata mbetet e tensionuar, dhe forcat e sigurisë janë në gjendje gatishmërie.
Shefi i NATO-s, Mark Rutte, gjithashtu reagoi ndaj sulmit, duke shprehur shqetësim për numrin e viktimave.
“NATO qëndron përkrah aleatit tonë, Turqisë. Ne dënojmë fuqimisht terrorizmin në të gjitha format e tij dhe po ndjekim me kujdes zhvillimet,” tha Rutte, duke theksuar se ka folur tashmë me presidentin turk.
Shefi i provincës Kahramankazan, Selim Çırpanoğlu, i cili ishte ndër të parët në vendin e sulmit, konfirmoi numrin e viktimave. Sipas tij, forcat e sigurisë po bëjnë gjithçka për të siguruar lirimin e pengjeve dhe stabilizimin e situatës.
Ky sulm është një goditje e rëndë për sigurinë e Turqisë. Hetimet janë në vazhdim, ndërsa i gjithë kompleksi industrial mbetet nën rrethim nga forcat e sigurisë.
