“Pushtuesit rusë kanë lëshuar rreth 100 raketa në Ukrainë”, duke tejkaluar sulmin masiv me raketa më 10 tetor, kur ata hodhën 84 raketa kundër Ukrainës. Presidenti Volodymyr Zelensky ka thënë se 85 raketa janë lëshuar kundër Ukrainës të martën dhe 20 të tjera pritet të godasin vendin.
Në një video të shpërndarë në Telegram, ai paralajmëroi banorët që të qëndrojnë në strehimore.
Nënkryetari i zyrës së presidentit, Kyrylo Tymoshenko, tha se situata në të gjithë vendin ishte “kritike” pasi raketat goditën objektet energjetike, duke detyruar mbyllje emergjente dhe duke zhytur në errësirë pjesë të Kievit
“Terroristët rusë kryen një tjetër sulm të planifikuar në objektet e infrastrukturës energjetike. Situata në Kiev ishte jashtëzakonisht e vështirë”, theksoi ai.
Një person është vrarë nga një sulm raketor rus në kryeqytetin e Ukrainës, ka deklaruar kryebashkiaku Vitali Klitschko. Ai tha se ekipet e shpëtimit nxorrën një trup nga një ndërtesë banimi e goditur në rrethin qendror Pechersk, ndërsa operacionet e kërkim-shpëtimit vazhduan.
Ndërkaq përfaqësuesi i lartë i BE-së për politikë të jashtme, Josep Borrell ka deklaruar se Ukraina ka rikuperuar 50% të territoreve të pushtuara nga Rusia që nga 24 shkurti.
Në një konferencë për media në fund të Këshillit të Mbrojtjes, ku morën pjesë edhe ministri ukrainas i mbrojtjes, Andriy Zahorodniuk dhe sekretari i përgjithshëm i NATO-s, Jens Stoltenberg, Borrell theksoi se “në frontet lindore dhe jugore, pajisjet e furnizuara nga BE dhe SHBA për forcat e armatosura ukrainase po rezultojnë të jenë jashtëzakonisht të dobishme, sidomos sistemet e mbrojtjes ajrore”.
