Një ekip kinez ka zbuluar një koronavirus të ri te lakuriqët e natës, i cili paraqet rrezik për t’u transmetuar nga kafshët te njerëzit, pasi përdor të njëjtin receptor njerëzor si virusi që shkakton Covid-19.
Studimi u drejtua nga Shi Zhengli – virologia e njohur si “gruaja-lakuriq nate” për kërkimet e saj të gjera mbi koronaviruset te lakuriqët – në laboratorin e Guangzhou-së, në bashkëpunim me studiues nga Akademia e Shkencave e Guangzhou-së, Universiteti i Wuhan-it dhe Instituti i Virologjisë në Wuhan, raporton South China Morning Post.
Shi është më e njohura për punën e saj në Institutin e Wuhan-it, i cili ndodhet në qendër të polemikave mbi origjinën e Covid-it, me një teori që sugjeron se virusi mund të ketë rrjedhur nga një laborator në atë qytet.
Edhe pse nuk ka një konsensus shkencor mbi origjinën e virusit, disa studime sugjerojnë se ai ka origjinën nga lakuriqët e natës dhe ka kaluar te njerëzit përmes një kafshe ndërmjetëse. Shi ka mohuar çdo përgjegjësi të institutit për shpërthimin e pandemisë.
Zbulimi i fundit paraqet një linjë të re të koronavirusit HKU5, i cili për herë të parë u identifikua te një lakuriq nate pipistrel në Hong Kong.
Virusi i ri i përket nëngrupit merbekovirus, që përfshin gjithashtu virusin që shkakton Sindromën Respiratore të Lindjes së Mesme (MERS).
Ky virus i ri është i aftë të lidhet me enzimën konvertuese të angiotenzinës (ACE2) në qelizat njerëzore, i njëjti receptor që përdor virusi Sars-CoV-2 për të infektuar qelizat, duke shkaktuar sëmundjen Covid-19.
Kujtojmë se pandemia e Covid-19, e cila filloi në fund të vitit 2019, u shkaktua nga virusi Sars-CoV-2, i cili ka origjinën nga lakuriqët e natës dhe, sipas studimeve shkencore, ka kaluar te njerëzit përmes një kafshe ndërmjetëse. Kjo krizë globale shkaktoi më shumë se 6 milionë vdekje dhe ndryshoi ndjeshëm stilin e jetesës në mbarë botën.
Kontroversat mbi origjinën e virusit kanë shoqëruar pandeminë që nga fillimi, me teori mbi rrjedhjen e mundshme nga një laborator në Wuhan, si dhe hipoteza mbi transmetimin natyror të virusit nga kafshët te njerëzit. Pavarësisht viteve të hulumtimeve, ende nuk është arritur një marrëveshje për origjinën e saktë të virusit.
Zbulimet si ky i fundit mbi koronaviruset te lakuriqët e natës, të raportuara nga shkencëtarët kinezë, theksojnë rëndësinë e monitorimit të vazhdueshëm të sëmundjeve zoonotike, pasi ato janë kyçe për parandalimin e pandemive të ardhshme.
