“Që nga fillimi i agresionit, okupatori ka shkatërruar sistematikisht çdo aspekt të jetës në Rripin e Gazës, ku shëndetësia që është ndër sektorët më të prekur”, tha kirurgu palestinez Fadel Naim
Kirurgu palestinez, Fadel Naim tha se Izraeli po shkatërron sistematikisht sistemin e kujdesit shëndetësor në Rripin e Gazës mes luftës së tij gjenocidale në enklavë, raporton Anadolu.
Dr. Fadel Naim, një kirurg ortoped në Spitalin Baptist Al-Ahli në qytetin e Gazës, tha se sistemi i kujdesit shëndetësor në enklavë është në prag të kolapsit, me spitalet që nuk mund të përballojnë numrin në rritje të viktimave.
“Që nga fillimi i agresionit, okupatori ka shkatërruar sistematikisht çdo aspekt të jetës në Rripin e Gazës, ku shëndetësia që është ndër sektorët më të prekur”, tha Naim në një video të publikuar në llogarinë e tij X.
“Ndër sektorët më të prekur ka qenë sistemi i kujdesit shëndetësor, i cili është shënjestruar qëllimisht në të gjitha nivelet nga infrastruktura, sistemet, pajisjet e deri te personeli mjekësor”, tha Naim.
Ai shtoi se një sulm vdekjeprurës izraelit kishte në shënjestër Spitalin Baptist në tetor 2023, ku u vranë mbi 500 njerëz dhe u shkaktuan dëme të pjesshme në spital.
“Okupatori shënjestronte sistematikisht të gjitha spitalet dhe objektet mjekësore në Gaza, përfshirë spitalet kryesore si Al-Shifa, Nasser, Al-Quds, Kamal Adwan, Al-Rantisi, Al-Awda dhe qendra më të vogla të kujdesit shëndetësor”, shtoi ai.
– Spital i mbingarkuar
Sulmet izraelite kanë detyruar pothuajse të gjitha spitalet në Gaza të ndërpresin funksionimin, duke e lënë Spitalin Baptist të vetmin objekt mjekësor operacional në qytetin e Gazës.
“Pas shkatërrimit të të gjitha spitaleve në qytetin e Gazës dhe në pjesën veriore, Spitali Baptist është bërë i vetmi institucion që ofron shërbime kirurgjikale, mjekësi të brendshme dhe shërbime të tjera shëndetësore”, shpjegoi Naim.
“Kapaciteti normal i spitalit është 30 deri në 50 shtretër, por sot kemi mbi 150 pacientë dhe ndonjëherë ky numër ka arritur në 300”, tha ai, duke shtuar: “Ne jemi detyruar të shfrytëzojmë çdo hapësirë në spital, qoftë kishë apo bibliotekë, duke i shndërruar ato në reparte për të lënduarit”.
– Mungesa kritike
Kirurgu theksoi mungesën e madhe të burimeve thelbësore në spital për shkak të bllokadës shkatërruese izraelite në Gaza.
“Çdo ditë, ne përballemi me rrezikun e mbarimit të naftës, gjë që na detyron të ndalojmë shërbimet thelbësore si larja e rrobave kirurgjikale, sterilizimi i pajisjeve kirurgjikale apo edhe operimi i të vetmit skaner tomografik në veri të Gazës në Spitalin Al-Ahli”, tha Naim.
Spitali gjithashtu po përpiqet të kujdeset për pacientët në nevojë.
“Një çështje veçanërisht urgjente është numri i madh i pacientëve me sëmundje kronike, përfshirë të moshuarit, fëmijët, ata me diabet, hipertension, kancer, dështim të veshkave dhe kushte komplekse pediatrike”, theksoi kirurgu Naimi, duke shtuar:
“Këta pacientë shpesh anashkalohen për shkak të mbipopullimit të spitalit dhe mungesës së aftësive dhe personelit të specializuar mjekësor”.
– Thirrje për veprim urgjent
Mjeku palestinez bëri thirrje për veprime urgjente për të ndalur sulmet izraelite ndaj spitaleve në Gaza.
“Ekziston një nevojë urgjente për të ushtruar presion maksimal mbi okupatorin për të siguruar mbrojtjen e objekteve mjekësore dhe personelit”, tha ai, duke shtuar:
“Ne gjithashtu bëjmë thirrje për ngritjen e spitaleve të specializuara në terren dhe sigurimin e ekipeve të nevojshme mjekësore për funksionimin e këtyre spitaleve”.
Situata në Spitalin Baptist është pasqyrë e krizës më të gjerë të kujdesit shëndetësor në Gaza, ku objektet shëndetësore po luftojnë për të përballuar shkatërrimin masiv dhe mungesën e burimeve për shkak të sulmeve izraelite.
Ushtria izraelite ka vënë në shënjestër sistematikisht objektet publike, ndërtesat e banimit dhe infrastrukturën gjatë rrjedhës së luftës së saj vdekjeprurëse në Gaza, duke përkeqësuar kushtet tashmë të këqija të jetesës për mbi dy milionë palestinezë në enklavë.
Izraeli ka vazhduar luftën gjenocidale në Rripin e Gazës duke vrarë më shumë se 45.300 palestinezë, shumica prej tyre gra dhe fëmijë, që nga sulmi i grupit palestinez të rezistencës Hamas më 7 tetor 2023.
Muajin e kaluar, Gjykata Penale Ndërkombëtare (GJNP) lëshoi urdhër-arreste për kryeministrin izraelit Benjamin Netanyahu dhe ish-ministrin e mbrojtjes Yoav Gallant për krime lufte dhe krime kundër njerëzimit në Gaza.
Izraeli po përballet gjithashtu me padi për gjenocid në Gjykatën Ndërkombëtare të Drejtësisë (GJND) për veprimet e tij në Gaza.
