Vaksinimi u shty javën e kaluar për shkak të bombardimeve intensive, urdhrave për evakuim masiv dhe mungesës së qasjes ose pauzave humanitare, tha Tedros Adhanom Ghebreyesus
Shefi i Organizatës Botërore të Shëndetësisë (OBSH), Tedros Adhanom Ghebreyesus, njoftoi se vaksinimi i shtyrë i poliomielitit në Gazën veriore, ku Izraeli nisi operacionet ushtarake në fillim të tetorit, do të rifillojë të shtunën, transmeton Anadolu.
“Nesër, faza e tretë e fushatës së vaksinimit ndaj poliomielitit do të fillojë në pjesën veriore të Rripit të Gazës, pasi ajo u shty javën e kaluar për shkak të bombardimeve intensive, urdhrave për evakuim masiv dhe mungesës së qasjes ose pauzave humanitare”, tha Ghebreyesus në një konferencë për media të OBSH-së.
Tedros theksoi se pauza humanitare është “e nevojshme” për të kryer fushatën, por shtoi: “Zona e pauzës është zvogëluar ndjeshëm dhe tani është e kufizuar vetëm në qytetin e Gazës”.
Duke vënë në dukje se faza e fundit e fushatës synonte të arrinte rreth 119.000 fëmijë nën moshën 10 vjeç, ai tha se “arritja e këtij objektivi tani është e pamundur, pasi kushtet në Gazën veriore përkeqësohen çdo ditë”.
Faza e parë e fushatës, e cila përfundoi më 12 shtator, përfshiu mbi gjysmë milioni fëmijë palestinezë.
Rreth 590.000 fëmijë në të gjithë Gazën supozohet të marrin dozën e dytë, sipas OBSH-së.
Tedros përmendi gjithashtu përpjekjet e agjencisë së OKB-së për të arritur në Gazën veriore, duke thënë se në dy javët e fundit, OBSH ka kryer gjashtë misione për të sjellë furnizime mjekësore dhe ushqim për stafin e spitalit dhe pacientët kur lejohet, si dhe karburant për të mbajtur funksional gjeneratorët.
“Në ditët e fundit, pas luftimeve intensive, rrethimit dhe bastisjeve, spitali Kamal Adwan është reduktuar nga një spital që ndihmon qindra pacientë me dhjetëra punonjës shëndetësorë, në një skelet më vete”, tha ai.
Ai tha se OBSH-ja ndihmoi në zhvendosjen e pacientëve më kritikë në spitalet Nasser dhe Shifa, ku ata mund të marrin një nivel më të lartë kujdesi.
“Tani disa dhjetëra pacientë mbeten në Kamal Adwan, me një pjesë të vogël të stafit që kujdeset për ta”, tha ai, duke shtuar: “Një sulm dhe zjarri që u përhap pas sulmit në një nga katet e spitalit ka shkatërruar disa nga furnizimet që kemi dorëzuar. Ne po përpiqemi të kontaktojmë stafin e spitalit për më shumë informacion”.
