Mustafa Şentop diskutoi rreth krizës në Ukrainë dhe përkushtimin e Ankarasë për paqe me presidentin slloven Pahor dhe kryeministrin Jansa.
Bisedimet midis zyrtarëve rusë dhe ukrainas që do të mbahen në Stamboll janë kulmi i përpjekjeve të pandërprera të Turqisë për të ndërmjetësuar paqen midis dy palëve, tha kryetari i parlamentit turk, raporton Anadolu Agency (AA).
“Ky është hapi i duhur. Është ajo që duhet të ndodhë”, tha Mustafa Şentop në kryeqytetin e Sllovenisë Ljubljanë, ku mbërriti të dielën në mbrëmje për të marrë pjesë në Konferencën e Kryetarëve të Parlamenteve të Bashkimit Evropian.
Ai diskutoi krizën e Ukrainës dhe përkushtimin e Ankarasë për paqen midis Moskës dhe Kievit në takime me zyrtarë të lartë sllovenë, duke përfshirë presidentin Borut Pahor, kryeministrin Janez Jansa dhe kryetarin e Asamblesë Kombëtare të Sllovenisë Igor Zorcic.
“Turqia është i vetmi vend që ka qenë në bisedime me Ukrainën dhe Rusinë që nga fillimi dhe është përpjekur për një armëpushim”, tha Sentop.
Ai tha se të gjithë shpresojnë për një ndërprerje të armiqësive, duke përfshirë “të gjithë politikanët dhe burrshtetasit në rajon dhe në botë”.
“Njerëzit shpresojnë se do të ketë një armëpushim. Por për të arritur këtë është e domosdoshme të binden të dy palët që të takohen dhe t’i ulim ata së bashku”, tha ai, duke shtuar se presidenti turk Recep Tayyip Erdoğan ka bërë “përpjekje të mëdha” për ta bërë realitet takimin e ardhshëm të Stambollit.
Selman Ozboyaci, anëtari i Komitetit të Përbashkët Parlamentar Turqi-Bashkimi Evropian, mori pjesë gjithashtu në takime.
