Kryeministri i Kosovës, Albin Kurti ka shkruar për Ditën e Evropës duke theksuar se Kosova duhet të jetë pjesë e familjes evropiane, e rrugëtimi të vlerësohet në baza meritokracie.
Në një postim në Facebook, Kurti ka thënë se Kosova e ka dëshmon vazhdimisht gatishmërinë për të kontribuar në mbrojtje të demokracisë.
“Republika e Kosovës jo vetëm që i bashkohet thirrjeve dhe misionit të mbrojtjes së demokracisë anekënd Evropës, por edhe në vazhdimësi dëshmon vullnetin e gatishmërinë për të kontribuar në këtë drejtim, si në përafrimin e politikës së jashtme të vendit me atë të Bashkimit Evropian, por edhe në mbështetjen e të gjitha masave të vendosura ndaj agresionit të pajustifikuar rus ndaj Ukrainës”, ka shkruar Kurti.
“Por që të kontribuojmë e të bëjmë edhe më shumë, duhet të jemi pjesë e familjes evropiane e rrugëtimi ynë të vlerësohet në baza meritokracie. Teksa edhe zgjerimi është rikthyer në vëmendje e agjendën e BE-së pas shumë vitesh, vendi ynë ka aplikuar dhe për anëtarësim në Bashkimin Evropian. Avancimi i vendit tonë në rrugën drejt BE-së, do ishte sinjal pozitiv për vendin dhe për vlerat demokratike”, ka theksuar tutje ai.
