Tarifat doganore të shpallura – e disa tashmë të zbatuara – nga presidenti amerikan Donald Trump i kanë detyruar liderët anembanë botës të përdorin strategji të reja diplomatike dhe ekonomike për të zbutur pasojat. Në këtë skenar të ndërlikuar, duket se një rol të veçantë do të luajë kryeministrja italiane Giorgia Meloni.
Meloni ka paralajmëruar se javën që vjen do të udhëtojë në Uashington për t’u takuar me Donald Trumpin, me qëllim që të arrijë një marrëveshje për çështjen e tarifave. Ajo ka thënë se synon ta “qetësojë” Trumpin në ofensivën e tij kundër rendit aktual botëror dhe rrjeteve globale tregtare, të cilat ai po përpiqet t’i trazojë me tarifa që, sipas saj, janë “mjaft të pakuptimta”.
Evropa nuk është e bindur
Megjithatë, lëvizja e Melonit nuk po pritet me entuziazëm në Evropë. Disa zyrtarë shpresojnë se takimi mund të sjellë rezultate pozitive, por Brukseli dhe Parisi shprehen të shqetësuar se Meloni do të veprojë vetëm në interes të Italisë, duke shpërfillur qëndrimin e përbashkët të BE-së.
“Duhet të qëndrojmë të bashkuar, sepse Evropa është e fortë kur është e bashkuar. Nëse fillojmë të zhvillojmë negociata bilaterale, do ta minojmë këtë njëzëri”, tha ministri francez i industrisë, Marc Ferracci.
Rreziku i izolimit
Profesori Giovanni Orsini ka vlerësuar se strategjia e Melonit është e rrezikshme dhe se ajo rrezikon të bëhet “ndërmjetëse e një divorci të dhimbshëm nga BE-ja” – ose, në rastin më të keq, “viktima e parë” e tij.
Edhe Leo Goretti, profesor në Institutin Romak për Marrëdhënie Ndërkombëtare, beson se Meloni e ka përpara një mision jashtëzakonisht të vështirë.
“Po flasim për një president të paparashikueshëm, me diskurs të hapur nacionalist dhe antievropian. Shtetet e Bashkuara janë një treg i rëndësishëm për Italinë, por BE është edhe më shumë. Roma përfiton miliarda nga fondet evropiane. Për më tepër, çfarë dobie ka nëse një kompani italiane trajtohet në mënyrë të favorshme, ndërsa partnerët e saj gjermanë apo francezë penalizohen nga tarifat?”, është shprehur ai.
Pasojat për BE-në
Ekspertët paralajmërojnë se veprimi i Melonit mund të ngadalësojë reagimin e koordinuar evropian ndaj tarifave amerikane dhe se Roma mund të provokojë zemërimin e vendeve të tjera anëtare të BE-së.
Në një ton të ngjashëm u shpreh edhe ministri francez për Evropën, Benjamin Haddad:
“A besojmë vërtet se do të jemi më të fortë nëse shkojmë në SHBA të ndarë, në vend që të veprojmë si një bllok prej 27 vendesh?”, pyeti ai, sipas El Confidencial.
Prova e 17 prillit
Vizita e Giorgia Melonit, e planifikuar për 17 prill, do të jetë një test i madh jo vetëm për marrëdhëniet e saj personale me Trumpin, por edhe për pozicionin e Italisë në raport me SHBA-në dhe BE-në.
Meloni do të duhet të zgjedhë:
Të “luajë për rrethin” dhe të harrojë taktikën, duke ndjekur interesat e ngushta kombëtare – ose të sjellë zërin e një Evrope që po përpiqet të japë një përgjigje të bashkuar ndaj “çmendurisë tregtare” që po vjen nga Shtëpia e Bardhë.
