ekretari i Jashtëm i Mbretërisë së Bashkuar, David Lammy, është pritur në Prishtinë nga presidentja e Kosovës, Vjosa Osmani, e cila e ka deklaruar se ndihma e Mbretërisë së Bashkuar për Kosovën është historike, raporton Anadolu.
Presidentja Osmani tha se Kosova dhe Mbretëria e Bashkuar kanë marrëdhënie të shkëlqyera dhe të ndërtuara në vlera të përbashkëta të demokracisë, lirisë dhe paqes.
Osmani gjithashtu njoftoi se i ka propozuar sekretarit Lammy për lidhjen e një marrëveshje për thellimin strategjik të bashkëpunimit midis Kosovës dhe Mbretërisë së Bashkuar që në veçanti mbulon fushën e mbrojtjes dhe ekonomisë.
“Jemi të përkushtuar të vazhdojmë bashkëpunimin ndërmjet institucioneve tona për ta konkretizuar këtë marrëveshje dhe për t’i dhënë formën e duhur dhe ta nënshkruajmë sa më parë që është e mundur. Konsideroj se ka hapësirë të jashtëzakonshme për fuqizim të mëtejshëm të aleancës tonë dhe prezencë akoma më aktive të Mbretërisë së Bashkuar në Kosovë dhe anasjelltas”, theksoi Osmani.
Ajo shtoi se në këtë frymë presin angazhimin e Ministrisë së Mbrojtjes të Mbretërisë së Bashkuar edhe sa i përket eksportit të armëve në Kosovë, hap i cili sipas saj, do të forcojë sigurinë kosovare dhe do të ndihmojë në avancimin e industrisë së mbrojtjes së Mbretërisë së Bashkuar.
Presidentja kosovare njoftoi se kanë arritur thellim të raporteve në çështje të sigurisë me Mbretërinë e Bashkuar, si dhe shtoi se ka ende hapësirë për fuqizim të aleancës dhe të prezencës së Mbretërisë së Bashkuar në Kosovë.
Në takim me sekretarin Lammy, Osmani tha se kanë diskutuar edhe mbi çështjen e dialogut me Serbinë, duke theksuar se pala kosovare mbetet e përkushtuar dhe konstruktive për paqe dhe stabilitetit, derisa ajo përsëriti nevojën që Serbia t’i vendos para përgjegjësisë autorët e sulmeve të fundit terroriste në veri të Kosovës.
Sekretari i jashtëm britanik, David Lammy, tha se Mbretëria e Bashkuar vazhdon të luaj rol thelbësor si mik dhe partner kyç i Kosovës. Ai tha se është e rëndësishme që Kosova të shënojë progres në rrugëtimin e saj euroatlantik dhe me mbështetjen e Mbretërisë së Bashkuar të anëtarësohet në Këshillin e Evropës.
Lammy në fjalën e tij theksoi se rajoni i Ballkanit ka qenë me rëndësi kur Tonny Blair ishte kryeminsitër i Mbretërisë së Bashkuar dhe është me rëndësi edhe sot.
“Janë disa gjëra që ne dëshirojmë t’i shohim si pjesë e zhvillimit të këtij partneriteti. Dëshirojmë një normalizim të qëndrueshëm dhe paqësor midis Kosovës dhe Serbisë. Mbretëria e Bashkuar është padyshim kontribuuese e madhe në KFOR. E kam vizituar KFOR-in herën e fundit që isha këtu dhe do ta vizitojë prapë. Është vendimtare për sigurinë tuaj dhe shpresoj që qeveria e ardhshme do t’i adresojë të gjitha nevojat e qytetarëve, përfshirë progresin në integrimin e serbëve në Kosovë dhe angazhimin e fuqishëm në dialogun e udhëhequr nga BE-ja”, tha Lammy.
Sekretari britanik tha se është e rëndësishme që “ta shohim Kosovën duke bërë progres në rrugëtimin e saj euroatlantik”, si dhe theksoi se teknologjia, inovacioni dhe energjia janë disa fusha me të cilat Mbretëria e Bashkuar dëshiron të bashkëpunojë me Kosovën.
Lammy, i cili arriti mbrëmë në Kosovë, u prit në takim edhe nga kryeministri në detyrë, Albin Kurti, ministrja në detyrë e Punëve të Jashtme dhe Diasporës, Donika Gërvalla dhe ministrja të tjerë të kabinetit të qeverisë në detyrë.
Kurti e njoftoi sekretarin britanik edhe për investimet në fushën e mbrojtjes dhe arritjen e nivelit të buxhetit për mbrojtje në 2 për qind të prodhimit të brendshëm bruto si standard i NATO-s, si dhe theksoi objektivat dhe synimet parësore të Kosovës për anëtarësim në NATO, BE dhe në Këshillin e Evropës.
