Lëshohen në hapësirë dy satelitët e Shqipërisë

Kryeministri Rama ka publikuar në rrjetet sociale videon nga momentet e lëshimit të satelitëve “Albania 1” dhe “Albania 2”

Kryeministri i Shqipërisë, Edi Rama, ka konfirmuar se satelitët e Shqipërisë janë lëshuar në hapësirë.

Kryeministri Rama ka publikuar në rrjetet sociale edhe videon nga momentet e lëshimit të satelitëve.

“Sapo është lëshuar nga Cape Canaveral, Florida, raketa Falcon 9, misioni i përbashkët i SpaceX Transporter 6 që transporton për në hapësirë edhe satelitët tanë, Albania 1 dhe Albania 2”, ka shkruar Rama.

Kujtojmë se disa muaj më parë, mes Shqipërisë dhe operatorit “Satellogic USA Inc” është nënshkruar një kontratë e shërbimit satelitor në fushën e mbrojtjes dhe sigurisë për monitorimin e territorit të vendit.

Sipas autoriteteve shqiptare, kontrata konsiston në përdorimin ekskluziv të dy satelitëve për një periudhë trevjeçare, për monitorimin e territorit të Shqipërisë, zhvillimin e kapaciteteve teknike e profesionale për përdorimin e shërbimit satelitor, përpunimin e Informacionit Gjeohapësinor (GIS), si dhe ofrimin e produkteve të imazherisë.

Kategoritë
LajmeRajoni