Forcat izraelite në jug të Libanit hapën zjarr ndaj protestuesve që kërkonin tërheqjen e tyre në përputhje me marrëveshjen e armëpushimit, duke vrarë të paktën 15 persona dhe plagosur më shumë se 80 të tjerë.
Mes të vrarëve janë dy gra dhe një ushtar i ushtrisë libaneze, sipas një deklarate nga Ministria e Shëndetësisë e Libanit.
Raportohet se persona u plagosën në më shumë se dhjetë fshatra në zonën kufitare.
Protestuesit, disa prej të cilëve mbanin flamuj të Hezbollahut, u përpoqën të hyjnë në disa fshatra për të protestuar kundër dështimit të Izraelit për t’u tërhequr nga jugu i Libanit brenda afatit 60-ditor të parashikuar nga marrëveshja e armëpushimit, e cila ndali luftën mes Izraelit dhe Hezbollahut në fund të nëntorit.
Izraeli deklaroi se duhet të qëndrojë më gjatë sepse ushtria libaneze nuk është dislokuar në të gjitha zonat e jugut të Libanit për të siguruar që Hezbollahu të mos rikthejë praninë e tij në atë zonë.
Ushtria libaneze tha se nuk mund të dislokohet derisa forcat izraelite të tërhiqen, ndërsa ushtria izraelite fajësoi Hezbollahun për nxitjen e protestave të së dielës.
Në një deklaratë, ushtria izraelite tha se trupat e saj kishin hapur zjarr paralajmërues për të “eliminuar kërcënimet në disa zona ku të dyshuar po afroheshin.”
Gjithashtu, u bë e ditur se disa të dyshuar pranë trupave izraelite janë arrestuar dhe po merren në pyetje.
