Liderët e partisë së djathtë Alternativa për Gjermaninë (AfD) janë shprehur pas publikimit të sondazheve pas votimeve, të cilat tregojnë se partia e tyre ka zënë vendin e dytë me mbështetje të fuqishme nga votuesit.
Bashkëkryetari i partisë, Tino Chrupalla, shprehu kënaqësinë për rezultatin e arritur, duke theksuar se është “shumë krenar për partinë tonë”.
“Ne ishim të bashkuar, zhvilluam një fushatë të synuar dhe treguam disiplinë,” tha Chrupalla, duke qëndruar pranë bashkëkryetares së partisë, Alice Weidel.
Ai shtoi se AfD mund të sjellë “ndryshime epokale” dhe theksoi se “janë gjithmonë të hapur për negociata”.
“Kemi fituar besimin e votuesve dhe këtë duhet ta pranojnë të gjithë,” u shpreh ai.
Megjithatë, partitë e tjera politike mbeten në qëndrimin se nuk do të hyjnë në koalicion me AfD-në. Pavarësisht kësaj, Chrupalla thekson se partia e tij ka marrë një “mandat për ndryshime politike”.
