Një nga momentet më të rëndësishme politike të shënuara në zgjedhjet parlamentare në Gjermani ishte fitorja e ekstremit të djathtë (AfD) në lindje të vendit. Megjithatë, përjashtime u shënuan në dy rajone.
Në Saksoni, AfD shënoi fitore të thellë në të gjitha qarqet, përveç njërit. Në qarkun Leipzig II, megjithëse AfD fitoi në përgjithësi në këtë qytet, vendin e parë në mënyrë bindëse e mori partia e majtë Die Linke.
Kjo parti fitoi 23,9 për qind të votave në qarkun Leipzig II, duke e lënë AfD-në në vendin e dytë me 18,7 për qind të votave. Fitorja e Die Linke në këtë qark u sigurua nga politikani i njohur Sören Pellmann. Ai e komentoi këtë fitore edhe në rrjetet sociale, duke e përshkruar në një mënyrë interesante — si betejën mes Galëve dhe Romakëve.
“Pas një nate të shkëlqyer, ka ardhur koha që Galia të kundërsulmojë. Së bashku duhet t’i shtyjmë Romakët dhe t’i bindim për pozicionet tona. Do të arrijmë sukses si fraksion,” tha Pellmann.
Një situatë e ngjashme ndodhi edhe në landin fqinj të Turingisë, i cili prej kohësh është një nga bastionet më të forta të AfD-së. Ashtu si në Saksoni, AfD fitoi shumicën e qarqeve në këtë land, përveç njërit, ku sërish fitoi Die Linke.
Në qarkun Erfurt-Weimar II, fitoren e siguroi Bodo Ramelow, duke marrë 36,8 për qind të votave.
Die Linke, si parti, shënoi një rezultat mjaft të mirë në zgjedhjet gjermane me 8,77 për qind të votave, duke siguruar pjesëmarrjen në parlament. Edhe pse ky numër nuk duket i lartë, është një arritje e rëndësishme, pasi gjatë dy viteve të fundit partia u përball me largimin e figurave më të njohura politike, çka çoi edhe në shpërbërjen e grupit parlamentar në Bundestag.
Megjithatë, falë reformave të brendshme dhe ndryshimit të udhëheqjes, partia arriti të rikuperojë një pjesë të fuqisë së saj dhe regjistroi një rritje prej pothuajse 3,9 për qind krahasuar me zgjedhjet parlamentare të vitit 2021.
