“Një armëpushim është rruga e vetme për të siguruar lirimin e pengjeve të mbetur dhe zbutjen e vuajtjeve në Gaza”, ka thënë presidenti francez Macron
Presidenti francez Emmanuel Macron theksoi sot nevojën urgjente për hapjen e të gjitha pikave të kalimit të ndihmave humanitare në Gaza, duke e quajtur atë “domosdoshmëri jetike” për popullatën civile, pasi kriza humanitare në enklavë vazhdon të përkeqësohet, transmeton Anadolu.
“Sapo kam folur me kryeministrin (izraelit) Benjamin Netanyahu”, tha Macron në X.
“Unë përsërita mbështetjen e Francës për sigurinë e Izraelit dhe popullin e tij. Lirimi i të gjithë pengjeve ka qenë gjithmonë një prioritet absolut”, tha ai.
Megjithatë, ai theksoi se një armëpushim është rruga e vetme për të siguruar lirimin e pengjeve të mbetur dhe zbutjen e vuajtjeve në Gaza.
“Hapja e të gjitha vendkalimeve të ndihmave humanitare është një domosdoshmëri jetike për popullatën civile të Gazës”, tha ai.
“E pashë në El-Arish, kjo ndihmë është e bllokuar në anën tjetër të kufirit. Ajo duhet të arrijë te civilët sa më shpejt që të jetë e mundur. Sprova që po përballon popullata civile e Gazës duhet të marrë fund”, shtoi ai.
Macron shtoi më tej se ai shpreson se në orët e ardhshme do të mundësohet çlirimi i më shumë pengjeve dhe një përparim politik.
Komentet e tij vijnë disa ditë pasi ai tha se Franca mund të njohë shtetin palestinez “në muajt e ardhshëm”, potencialisht gjatë një konference të OKB-së në New York në qershor.
“Ne duhet të shkojmë drejt njohjes dhe do ta bëjmë këtë”, tha Macron në një intervistë televizive javën e kaluar, duke bërë thirrje për njohje reciproke midis Izraelit dhe shteteve arabe.
Deklarata shkaktoi një reagim nga djali i kryeministrit izraelit Netanyahu, Yair Netanyahu, i cili sulmoi Macronin në rrjetet sociale, duke shkruar “Vafsh në djall!”, dhe duke bërë thirrje për lëvizje për pavarësi në territoret franceze.
Pavarësisht reagimit të ashpër, Macron përsëriti fokusin e tij për një armëpushim, lirimin e pengjeve, ndihmën humanitare dhe një zgjidhje politike afatgjatë të bazuar në kuadrin e dy shteteve.
