Më 13 korrik të vitit 1878, Mali i Zi u njoh si shtet i pavarur në Kongresin e Berlinit dhe në të njëjtën datë të vitit 1941, populli i Malit të Zi filloi kryengritjen kundër fashizmit.
Mali i Zi sot shënon Ditën e Shtetësisë, në kujtim të 13 korrikut 1878, kur u njoh si shtet i pavarur në Kongresin e Berlinit, si dhe të njëjtën datë në vitin 1941, kur populli malazez u ngrit në kryengritjen kundër fashizmit.
Me rastin e festës kombëtare, presidenti i Malit të Zi, Milo Gjukanoviq, organizoi një pritje të martën, në të cilën deklaroi se Bashkimi Evropian (BE) e ka kuptuar se është një moment kritik që të vazhdojë dhe në kohën e duhur të përfundojë procesin e bashkimit të Evropës, dhe kjo nënkupton anëtarësimin e afërt të Malit të Zi dhe vendeve të tjera të rajonit.
Ai tha se sot, 81 vjet pas Kryengritjes së 13 Korrikut të vitit 1941, në Malin e Zi të lirë e të pavarur, nuk është shuar ideja e madhe që kishte iniciuar kjo ngjarje madhështore.
Gjukanoviq theksoi se kjo ngjarje kishte një rëndësi universale në kohën e fatkeqësisë fashiste që po rrënonte Evropën.
“Kjo është arsyeja pse të mëdhenjtë e botës së asaj kohe e njohën atë si drejtimin ku duhet të shkojë njerëzimi. Trembëdhjetë korriku 1941 shënoi përgjithmonë rrugën e rivendosjes së identitetit shtetëror dhe kombëtar malazez, rrugën e përparimit dhe të një të ardhmeje premtuese evropiane”, tha Gjukanoviq.
Ai deklaroi se po aq frymëzues për Malin e Zi ishte edhe 13 korriku 1878, kur u konfirmua njohja ndërkombëtare e Malit të Zi për herë të parë në Kongresin e Berlinit.
Në pritjen në Pallatin e Kaltër në Cetinje morën pjesë përfaqësues të jetës politike, shkencore, kulturore, ekonomike dhe sportive të Malit të Zi, dhe ish-zyrtarë të lartë shtetërorë. Të pranishëm ishin edhe përfaqësues të trupit diplomatik dhe zyrtarë të lartë të organizatave dhe institucioneve ndërkombëtare.
