Manchester City ka shënuar fitore minimale me rezultat 1-0 ndaj Southamptonit në kuadër të javës së nëntë në elitën e futbollit anglez.
Goli i vetëm në këtë takim erdhi në minutën e pestë, kur Matheus Nunes e gjeti për mrekulli brenda zonës norvegjezin Haaland i cili shënoi për rezultatin 1-0.
Mysafirët rastin më të mirë për gol në këtë takim e patën pak para se të përfundonte pjesa e parë e ndeshjes.
Ishte Cameron Archer ai i cili në minutat shtesë bëri një goditje të fortë në drejtim të portës së Ederson, por që u ndal nga traversa.
Në pjesën e dytë, vendasit patën disa mundësi të mira shënimi me Haaland, por që ai nuk arriti të gjejë më rrugën e rrjetës.
Rasti më i mirë në pjesën e dytë i takoi Haalandit, i cili në minutën e 63-të nuk arriti të shënojë me kokë nga një distancë e afërt.
Me këtë fitore Man City ngjitet të paktën përkohësisht në krye të tabelës me 23 pikë të grumbulluara, dy më shumë se Liverpooli që gjendet në pozitën e dytë por me një ndeshje më pak të zhvilluar.
Javën e ardhshme Man City do të ketë punë në udhëtim ndaj Bournemouth, teksa Southampton do të jetë nikoqir i Evertonit.
