Gazeta amerikane Wall Street Journal njoftoi se marrëveshja e madhe për mineralet midis Ukrainës dhe SHBA-së pritet të nënshkruhet sot. Marrëveshja parashikon që gjysma e burimeve natyrore të Ukrainës t’i kalojnë SHBA-së.
Presidenti Donald Trump, i cili fitoi zgjedhjet duke premtuar përfundimin e luftërave në botë, ka filluar të ndërmarrë hapa për të realizuar premtimet e tij.
Trump, i njohur për deklaratat e tij të guximshme se mund ta përfundojë luftën mes Ukrainës dhe Rusisë brenda 24 orëve, po ndërmerr veprime për të siguruar përfitimet më të mëdha për veten nga ky proces.
Pasi vendosi kontaktin e parë me Rusinë dhe zhvilloi një bisedë telefonike me Vladimir Putin, Trump filloi negociatat për paqe pa përfshirë Ukrainën dhe Evropën në tryezë.
SYTË TEK MINERALET E UKRAINËS
Pas bisedimeve me Rusinë, Trump u përball me reagime të ashpra nga Evropa dhe Ukraina. Duke shfrytëzuar situatën e vështirë të Ukrainës, ai hodhi në tavolinë një marrëveshje që parashikon kalimin e gjysmës së mineraleve të vendit nën kontrollin amerikan.
Mediat amerikane raportuan një zhvillim të ri lidhur me këtë marrëveshje, e cila pritet të favorizojë interesat e SHBA-së.
MARRËVESHJA PRITET TË NËNSHKRUHET SOT
Wall Street Journal raportoi se marrëveshja, e cila jo vetëm kërkon gjysmën e mineraleve të Ukrainës, por gjithashtu përfshin kërkesat për portet, infrastrukturën, si dhe bizneset e gazit natyror dhe naftës, është në fazën përfundimtare.
Në raport u theksua gjithashtu se këshilltari i sigurisë kombëtare i SHBA-së, Mike Waltz, konfirmoi se marrëveshja pritet të nënshkruhet sot nga presidenti ukrainas Volodymyr Zelensky.
ZELENSKY E KISHTE REFUZUAR VERSIONIN E PARË TË MARRËVESHJES
Fillimisht, Zelensky kishte refuzuar versionin e parë të marrëveshjes, e prezantuar më 12 shkurt, për shkak të mungesës së garancive të sigurisë.
Megjithatë, pala amerikane e rishikoi marrëveshjen më 20 shkurt, duke e bërë atë më të përshtatshme me ligjet ukrainase.
Deklaratat e Trump më 21 shkurt rritën pritshmëritë për nënshkrimin e marrëveshjes brenda një kohe shumë të shkurtër, duke theksuar përpjekjet intensive nga të dyja palët për të arritur një marrëveshje.
Zelensky u shpreh se kjo marrëveshje mund të forcojë marrëdhëniet mes dy vendeve, por theksoi nevojën për sqarimin e detajeve.
DETALJET E MARRËVESHJES
Marrëveshja do t’i japë SHBA-së akses në mineralet e rralla të tokës të Ukrainës, ndërsa SHBA do të vazhdojë ndihmën ushtarake për Kievin.
Ky proces fitoi ritëm pas një periudhe tensioni mes SHBA-së dhe Ukrainës javën e kaluar. Trump kishte akuzuar Ukrainën si iniciatore të luftës, ndërsa Zelensky kishte pohuar se Trump kishte rënë pre e dezinformatave ruse.
Trump e cilësoi marrëveshjen si një mundësi të madhe për të dyja vendet, duke pretenduar se Ukraina i ka dhënë në thelb dritën jeshile një marrëveshjeje me vlerë 500 miliardë dollarë.
Propozimi fillestar i SHBA-së kërkonte 50% të burimeve natyrore të Ukrainës, kërkesë që u konsiderua nga pala ukrainase si një “marrëveshje kolonialiste”.
