Organizata Botërore e Shëndetësisë (WHO) ka deklaruar se Covid-19 nuk është më emergjencë shëndetësore globale, transmeton Gazeta Metro.
Deklarata shënjon një hap të madh drejt përfundimit të pandemisë dhe vjen 3 vjet pas deklarimit të tij si alarmi më i lartë shëndetësorë.
Zyrtarët thanë se mesatarja e vdekjeve nga virusi ka rënë nga 100,000 viktima për javë sa ishte në janar të 2021 në shifrën afër 3,500 më 24 prill.
Kreu i OBSH Tedros Adhanom Ghebreyesus tha se janë regjistruar më së paku 7 milion viktima nga pandemia mirëpo në të vërtetë kjo shifër është rreth 20 milion viktima sipas tij. Kjo shifër është trefishi i matjeve zyrtare prandaj ai paralajmëroi se virusi mbetet të jetë një kërcënim.
“Dje, Komiteti i Emergjencës, u takua për herë të 15 dhe më rekomandoi mua të deklaroj fundin e emergjencës publike shëndetësore në rang ndërkombëtarë dhe unë pranova këtë rekomandim. Prandaj shprehem me shpresë të madhe se Covid-19 nuk është më emergjencë shëndetësore globale” tha Dr.Tedros.
Mirëpo ai paralajmëroi se largimi i alarmit të lartë për virusin nuk do të thotë që rreziku nuk ekziston më dhe se statusi i emergjencës mund të rikthehet nëse situata ndryshon.
“ Gjëja më e keqe që mund të bëjë një shtet është të përdorë këtë lajm si arsye për ta humbur interesimin dhe të rrëzojë sistemin që është ngritur deri më tani vetëm sa për të dërguar mesazh tek njerëzit se për covid-19 nuk duhet të shqetësoheni më” shtoi ai.
Organizata Botërore e Shëndetësisë në janar të 2020 kishte shpallur Covid-19 emergjencë globale shëndetësore./gazetametro.net
