Një studim i ri ka treguar se shikimi i videove në TikTok që promovojnë humbje ekstreme në peshë mund të dëmtojë seriozisht shëndetin mendor. Kalimi i shumë kohës në këtë rrjet social, veçanërisht shikimi i përmbajtjeve që promovojnë anoreksinë, dëmton vetëbesimin e grave të reja dhe rrit rrezikun e çrregullimeve të ushqyerjes, sipas një studimi nga Universiteti Charles Sturt në Australi.
“Hulumtimi ynë tregoi se më pak se 10 minuta ekspozim ndaj përmbajtjes së TikTok-ut që promovon anoreksinë kishte pasoja të menjëhershme negative në krijimin e imazhit të trupit ideal,” thuhet në raport.
Hulumtuesit gjithashtu vunë në dukje se ndikimi negativ psikologjik mund të ndodhë edhe kur përdorueset nuk kërkojnë domosdoshmërisht këtë lloj përmbajtjeje dhe e përdorin këtë rrjet social për një kohë të shkurtër.
Për të luftuar këtë problem, autorët e studimit rekomandojnë kontrolle dhe rregullore më të rrepta në lidhje me promovimin e anoreksisë, çrregullimeve të ushqyerjes dhe përmbajtjeve të TikTok-ut që promovojnë trupin “ideal.”
“Aktualisht, po ndërmerren hapa për të fshirë përmbajtjet e rrezikshme, përfshirë bllokimin e hashtag-ëve si #anorexia. Megjithatë, ekzistojnë mënyra të ndryshme përmes të cilave përdoruesit anashkalojnë këto kontrolle dhe është e nevojshme një rregullore e mëtejshme,” theksuan ata.
