“Aeroporti i Istanbulit ka zënë vendin e tij në mesin e qendrave më të rëndësishme të transfertave në botë dhe është bërë aeroporti më intensiv në Evropë”, tha ministri i Transportit dhe Infrastrukturës së Türkiye-s, Karaismailoğlu.
Ministri i Transportit dhe Infrastrukturës së Türkiye-s, Adil Karaismailoğlu deklaroi se pavarësisht pandemisë së COVID-19, Aeroporti i Istanbulit brenda një kohe të shkurtër është kthyer në një nga qendrat më të rëndësishme të transfertave në botë në fushën e aviacionit të Türkiye-s dhe se “në 4 vite janë ulur e ngritur gjithsej 1.109.386 avionë ndërsa mbi 160 milionë udhëtarë kanë përdorur Aeroportin e Istanbulit”, transmeton Anadolu Agency (AA).
Në një deklaratë me shkrim lidhur me Aeroportin e Istanbulit që u hapë më 29 tetor 2018, Karaismailoğlu theksoi se Aeroporti i Istanbulit që u vendos në shërbimin e qytetarëve pa dalë asnjë qindarkë nga arka e shtetit, feston 4 vjetorin.
Ai tha se Aeroporti i Istanbulit në një kohë të shkurtër ka lënë pas shumë rivalë të tij në botë për numrin e udhëtarëve dhe fluturimeve.
“Aeroporti i Istanbulit vazhdon trendin e fuqishëm që kapi bashkë me normalizimin pas periudhës së pandemisë. Aeroporti i Istanbulit ka zënë vendin e tij në mesin e qendrave më të rëndësishme të transfertave në botë dhe është bërë aeroporti më intensiv në Evropë. Sipas të dhënave nga Këshilli Ndërkombëtar i Aeroporteve Evropiane, aeroporti i Istanbulit është një ndër aeroportet që ka pritur më shumë udhëtarë në tremujorin e tretë të këtij viti dhe është renditur i pari në mesin e aeroporteve të Evropës me 19.957.147 udhëtarët e tij, duke lënë pas aeroportet e Londrës, Parisit dhe Amsterdamit”, tha Karaismailoğlu duke shtuar:
“Ndërkohë në periudhën janar-shtator të këtij viti ka pritur 313.778 fluturime si dhe 47.571.888 udhëtarë. Në 4 vite janë ulur e ngritur gjithsej 1.109.386 avionë dhe mbi 160 milionë e 268 mijë udhëtarë kanë përdorur Aeroportin e Istanbulit”.
– “Në Evropë kaos, në vendin tonë komoditet”
“Në sektorin e aviacionit në aeroportet e Evropës përjetohet kaos ndërsa në Türkiye komoditet (rehati)”, deklaroi Karaismailoğlu duke theksuar se në korrik 2022 kur Evropa ndodhej përballë me një prej sprovave më të vështira të aviacionit, Aeroporti i Istanbulit theu rekord historik me 1.422 fluturime ditore.
“Në këtë drejtim Aeroporti i Istanbulit në vitin 2019 ka pritur 329.900 fluturime dhe 52.009.220 udhëtarë dhe synon t’i arrijë këto shifra para vitit 2023”, potencoi ministri Karaismailoğlu.
Duke nënvizuar se udhëtarët marrin bagazhet e tyre për disa minuta pavarësisht fluksit, Karaismailoğlu ndau informacionin se “Check-in zgjat vetëm një minutë. Lexuesit e revistës për udhëtimet, Conde Nast Traveler e ka zgjedhur Aeroportin e Istanbulit si ‘Aeroportin më të mirë në botë’. Që nga dita e hapjes së tij e deri më tani Aeroporti i Istanbulit ka marrë mbi 60 çmime”.
