Në zgjedhjet e parakohshme parlamentare të mbajtura më 23 shkurt 2025, Unioni Kristian-Demokratik (CDU) dhe Unioni Kristian-Social (CSU) fituan 29% të votave, ndërsa partia e djathtë ekstreme Alternativa për Gjermaninë (AfD) shënoi një sukses historik me 19.5% të votave të fituara. Partia Socialdemokrate e Gjermanisë (SPD) pësoi rezultatin më të keq në historinë e saj, duke siguruar vetëm 16% të votave.
Ministri gjerman i Mbrojtjes dhe anëtari i SPD-së, Boris Pistorius, e përshkroi rezultatin zgjedhor të partisë së tij si një “katastrofë”. Në një intervistë për ARD, Pistorius deklaroi:“Ky është një rezultat shkatërrues dhe katastrofal.”
Ai theksoi nevojën për unitet brenda partisë për të kapërcyer këtë krizë.
Suksesi historik i AfD-së ka shkaktuar shqetësim midis partive tradicionale. Kryetari i CDU-së, Friedrich Merz, partia e të cilit fitoi përqindjen më të lartë të votave, premtoi një zhvendosje të fortë djathtas për të rikthyer votuesit që mbështetën AfD-në. Merz deklaroi:“Ne do të fitojmë zgjedhjet dhe atëherë makthi i kësaj qeverie do të përfundojë.”
Kancelari aktual, Olaf Scholz, e pranoi humbjen e SPD-së në zgjedhje. Gjatë një fjalimi para anëtarëve të partisë në Berlin, Scholz tha:“Ky është një rezultat i hidhur për Partinë Socialdemokrate dhe njëkohësisht një humbje zgjedhore.”Ai bëri thirrje për luftë për demokracinë dhe për unitet brenda partisë për të përballuar sfidat që pasojnë.
