Ministri i Punëve të Jashtme të Iranit, Abbas Araghchi, do të udhëtojë këtë javë për një vizitë zyrtare në Rusi, dhe një nga temat kryesore do të jenë negociatat ndërmjet Iranit dhe Shteteve të Bashkuara, të cilat filluan javën e kaluar në Oman.
Irani dhe SHBA zhvilluan në Oman bisedime “pozitive dhe konstruktive” dhe ranë dakord që t’i vazhdojnë ato të shtunën, në kuadër të një dialogu të fokusuar në zgjidhjen e krizës së përshkallëzuar rreth programit bërthamor iranian, sipas deklaratave të të dyja delegacioneve.
Udhëtimi i Araghchit në Moskë është planifikuar për fundjavën, sipas një njoftimi nga Ministria e Punëve të Jashtme e Iranit. Meqenëse fundjava në Iran është e premte, kjo sugjeron se ai do të udhëtojë drejt Moskës përpara se të rinisin bisedimet me SHBA-në.
Rusia, e cila ka një vend të përhershëm me të drejtë vetoje në Këshillin e Sigurimit të Kombeve të Bashkuara, ka luajtur një rol në negociatat bërthamore ndërmjet Perëndimit dhe Iranit si aleate e Teheranit dhe si njëra nga palët nënshkruese të marrëveshjes bërthamore të vitit 2015, nga e cila presidenti amerikan Donald Trump e tërhoqi SHBA-në në vitin 2018.
Moska ka bërë thirrje për përqendrim në kontaktet diplomatike, në vend të veprimeve që mund të çojnë në përshkallëzim.
Javën e kaluar, Rusia, Kina dhe Irani zhvilluan konsultime teknike në Moskë për programin bërthamor iranian.
