Ministrja për Çështje Ndërkombëtare dhe Evropiane e Austrisë, Beate Meinl-Reisinger, deklaroi sot në Sarajevë se veprimet e presidentit të Republikës Srpska, Milorad Dodik, përbëjnë kërcënim për stabilitetin, rendin kushtetues dhe integritetin territorial të Bosnjë dhe Hercegovinës.
Ajo theksoi se Austria, së bashku me Gjermaninë, ka vendosur të vendosë sanksione ndaj Dodikut, Nenad Stevandiqit dhe Radovan Viškoviqit.
“Mendoj se është e qartë të thuhet se veprimet e fundit të Milorad Dodikut janë një kërcënim për stabilitetin, rendin kushtetues dhe integritetin territorial të Bosnjë dhe Hercegovinës. Ne po i ndjekim me kujdes procedurat që janë duke u zhvilluar kundër tij dhe jemi të vetëdijshëm se Dodiku i injoron këto procedura dhe ka lënë vendin disa herë. Ne dëshirojmë ta mbështesim Bosnjën dhe Hercegovinën me veprime të vendosura. Jam e kënaqur të them se së bashku me Gjermaninë kemi vendosur të vendosim sanksione për ndalimin e hyrjes së Dodikut dhe dy personave të tjerë në vendet tona. Kështu duam të shprehim mbështetjen tonë për Bosnjën dhe Hercegovinën, e ardhmja e së cilës është në Bashkimin Evropian,” tha ajo.
Ajo shtoi se sanksionet tashmë kanë hyrë në fuqi.
“Atyre, pra Dodikut dhe të tjerëve, u ndalohet hyrja në Austri apo kalimi tranzit nëpër Austri. Mendoj se është e domosdoshme të japim një sinjal të qartë politik dhe se është e mençur të përpiqemi të de-përshkallëzojmë situatën sa më shumë të jetë e mundur. Nga ana tjetër, ne kemi edhe interesat tona, sepse Austria është pjesë e BE-së dhe kur dikush i kalon aq shumë vijat e kuqe, ne duhet të dërgojmë mesazhe të forta politike – dhe më vjen mirë që kemi mundësinë ta bëjmë këtë,” tha ministrja.
