Marlene Schiappa, ministrja franceze e politikës sociale, është kritikuar për shkak të pozimit për kopertinën e revistës Playboy.
Ajo është fotografuar me një fustan të bardhë që i ka theksuar dekoltenë. Ajo ka dhënë një intervistë të gjerë në të cilën ka folur për të drejtat e grave dhe komunitetin LGBT. Dalja e saj në revistën e lartpërmendur shkaktoi kritika nga kolegët e saj, përfshirë kryeministren Elisabeth Borne.
“Nuk është e përshtatshme, veçanërisht në këtë periudhë,” tha ajo, duke iu referuar trazirave aktuale në Francë për shkak të shtytjes së Emmanuel Macron për të futur reformën e pensioneve.
Ministrja Marlene shkoi në Twitter dhe iu përgjigj kritikave.
“Gratë duhet të kenë të drejtën të kenë kontrollin e trupit të tyre. Kudo dhe gjatë gjithë kohës. Në Francë, gratë janë të lira. Me respektin e duhur për kritikuesit dhe hipokritët,” shkroi ajo.
Disa kolegë vendosën ta mbështesin, e mes tyre është edhe ministri i Brendshëm Gerald Darmanin.
“Dua të them se Marlene Schiappa është një politikane e guximshme. Ajo ka karakter dhe stil. Nuk duhet të pajtohem me të, por e respektoj”, tha ai.
