Edhe një herë tjetër sulmuesi i Kombëtares së Kosovës, Vedat Muriqi ka treguar paraqitje të shkëlqyeshme me Mallorcan. Ai sot në ndeshjen kundër Gironas e cila përfundoi me rezultat të barabartë 1-1 luajti për 90 minuta, transmeton Gazeta Metro.
Mallorca nuk arriti për një ‘fije floku’ t’i sigurojë tre pikë në sfidën e sotme, pasi vetëm në minutën e 92’të nga penalltia barazoi mesfushori i Gironas, Samuel Saiz.
Vedat Muriqi nga SofaScore u vlerësua me notën 6.8, derisa ky ishte edhe një ndër vlerësimet më të mira në ekipin e tij. Me notën më të lartë te Mallorca u vlerësua (8.2) mesfushori ofanziv, Kang-In Lee.
Gjiganti kosovar duhet theksuar se, pati edhe një mundësi të mirë në minutën e 27’të të realizonte gol me kokë pas harkimit të Jaume Costa, megjithatë goditja e tij shkoi jashtë portës. Ai u ndëshkua edhe me karton të verdhë 2 minuta më vonë.Ish-sulmuesi i Lazios për 90 minuta bëri 22 pasime, 18 prej të cilave ishin të sakta. Ndërsa, dy pasime të tjera u vlerësuan që mund të rrezikonin portierin e Gironas, Juan Carlos.
28-vjeçari nga Prizreni deri më tani ka shënuar dy gola në katër paraqitje në La Liga me Mallorcan.
Javën e ardhshme skuadra e udhëhequr nga Javier Aguirre do të ketë punë jashtëzakonisht të vështirë pasi do të ndeshet në ‘Santiago Bernabeu’ ndaj Real Madrid. /gazetametro.net
