Elon Musk mori pjesë përmes lidhjes me video në nisjen zyrtare të fushatës së partisë së ekstremit të djathtë Alternativa për Gjermaninë (AfD), një muaj përpara zgjedhjeve kombëtare të 23 shkurtit.
Duke iu drejtuar turmës përpara fjalimit të kandidates kryesore Alice Weidel, miliarderi i teknologjisë tha se AfD ishte shpresa më e mirë për Gjermaninë.
“Unë mendoj se ka sinqerisht shumë fokus në fajin e kaluar dhe ne duhet të shkojmë përtej kësaj. Fëmijët nuk duhet të jenë fajtorë për mëkatet e prindërve të tyre apo edhe të stërgjyshërve të tyre”, tha ai.
Ai tha se Gjermania po vuante nga “shumë burokraci nga Brukseli”.
“Shpresoj shumë që AfD të dalë mirë dhe Alice Weidel të bëhet kancelare”, tha ai në përfundim të fjalimit që zgjati më pak se pesë minuta.
Brohoritjet shpërthyen nga rreth 4 500 mbështetës të AfD-se brenda vendit të ngjarjes në qytetin qendror, Halle.
Ndërhyrjet e mëparshme të Musk në fushatën zgjedhore gjermane kanë shkaktuar zemërim – ndërsa kritikët e kanë akuzuar atë për përdorimin e platformës së tij të mediave sociale X për të ndikuar në rezultatin e zgjedhjeve të ardhshme.
Më herët, Musk vlerësoi AfD-në si partinë e vetme që mund të shpëtonte Gjermaninë – dhe organizoi një bisedë të drejtpërdrejtë në X me Weidel në fillim të këtij muaji.
