Në Aeroportin Ndërkombëtar të Shkupit, doganierët konfiskuan më shumë se 43 kilogramë bizhuteri ari, që është një sasi rekord dhe vlera e të cilave vlerësohet në rreth 2,3 milionë euro, njoftoi Drejtoria doganore e Maqedonisë.
Në bazë të njohurive të mëparshme dhe dyshimeve të arsyeshme, një person me dokument udhëtimi serb, i cili ka mbërritur mbrëmë me një fluturim të rregullt në mbrëmje nga Stambolli, është dërguar për kontroll të detajuar dhe kontroll të bagazheve.
Në valixhen dhe bagazhin e tij u zbuluan bizhuteri të ndryshme ari, duke përfshirë ari të bardhë me diamante me certifikata të bashkangjitura.
Personi dhe malli janë ndalur përkohësisht dhe momentalisht është duke u kryer hetim, ndërsa për rastin menjëherë është njoftuar prokurori publik kujdestar për të kryer veprime të mëtutjeshme hetimore.
“Drejtoria doganore, në kuadër të prioriteteve të saj për mbrojtjen e shoqërisë dhe sigurisë së qytetarëve, është e fokusuar fuqishëm në luftimin e krimit dhe parandalimin e tregtisë së paligjshme. Në vitin 2022 do të kemi një rritje të dyfishtë të rasteve të parandalimit të tregtisë ilegale në të gjitha kategoritë krahasuar deri në vitin 2021”, ka thënë drejtoresha e Drejtorisë doganore, Sllavica Kutirov, përcjell “Nova Makedonija”.
