Në Doha ka nisur takimi i ministrave të jashtëm të Turqisë, Iranit dhe Rusisë në kuadër të procesit të Astanës, i cili lidhet me Sirinë. Takimi zhvillohet në një moment kur qeveria e Bashar al-Asadit në Siri po shembet me shpejtësi.
Në takim marrin pjesë Hakan Fidan, ministri i jashtëm i Turqisë, Sergej Lavrov, ministri i jashtëm i Rusisë, dhe Seyed Abbas Araghchi, ministri i jashtëm i Iranit.
Para takimit trepalësh në kuadër të procesit të Astanës, Fidan dhe Araghchi zhvilluan një takim të veçantë për të cilin është thënë se ishte konstruktiv dhe i gjerë.
Më herët, Araghchi njoftoi se në kuadër të procesit të Astanës është planifikuar një takim tjetër me praninë e ministrave të tjerë të jashtëm të rajonit për të shtunën në mbrëmje.
Ndërsa takimi është duke u zhvilluar, nga Siria raportohen informacione se rebelët ndodhen vetëm rreth njëzet kilometra larg Damaskut.
Turqia, Rusia dhe Irani janë tre shtete me interesa të mëdha gjeostrategjike në Siri dhe me ndikim të rëndësishëm mbi zhvillimet atje, ndaj e ardhmja e këtij vendi do të varet në masë të madhe nga marrëveshja mes tyre./Gazeta e Re
