Në sulmet izraelite në Rripin e Gazës që nga mëngjesi janë vrarë 57 palestinezë, kanë konfirmuar burime mjekësore për Al Jazeera Arabic.
Në një sulm izraelit ndaj një objekti mjekësor të UNRWA-së në kampin e refugjatëve Jabalia, janë vrarë të paktën 22 persona, përfshirë gra dhe fëmijë, njoftoi Zyra për Media e Qeverisë së Gazës.
“Dënojmë ashpër vazhdimin e gjenocidit të okupimit izraelit ndaj civilëve dhe personave të zhvendosur. Dënojmë këtë sulm barbar që në mënyrë të qëllimshme ka shënjestruar institucionet mjekësore dhe zonat humanitare,” thuhet në deklaratë.
Shtohet gjithashtu se Izraeli ka sulmuar 228 strehimore të civilëve që nga fillimi i luftës, në një “shkelje të qartë të të gjitha normave ndërkombëtare që mbrojnë civilët në konflikte.”
Organizatat ndërkombëtare humanitare që veprojnë në Gaza paralajmërojnë se popullsia nuk mund të përballojë më mungesën e ndihmave humanitare, pasi bllokada izraelite që zgjat tashmë prej një muaji po e mbyt territorin palestinez.
“U zgjova në mëngjes për të blerë bukë për fëmijët e mi, por gjeta të gjitha furrat të mbyllura,” tha Mahmud Khalil nga qyteti i Gazës.
Banorët frikësohen se rreziku nga uria do ta përfshijë sërish Gazën.
“Çmimi i miellit është rritur… dhe ne nuk mund ta përballojmë. Kemi frikë nga uria që e kemi përjetuar më herët në jug,” thanë banorët.
Që nga fillimi i luftës më 7 tetor 2023, të paktën 50.423 palestinezë janë vrarë dhe 114.638 janë plagosur në Gaza, sipas Ministrisë së Shëndetësisë së enklavës.
Në 24 orët e fundit, në spitalet e Gazës kanë mbërritur trupat e 24 personave të vrarë dhe janë trajtuar 55 të plagosur.
