Një ditë pas shpalljes së armëpushimit në Gaza nga liderët e Katarit dhe Shteteve të Bashkuara të Amerikës, duket se kryeministri izraelit Benjamin Netanyahu ka bërë një gabim të rrallë politik, duke e futur veten në një qoshe, shkruan CNN.
Marrëveshja e shpallur të mërkurën në Doha ende duhet të miratohet nga kabineti izraelit, dhe Netanyahu mund të mos ketë pasur mbështetjen e nevojshme për negociatat përfundimtare. Ky takim i qeverisë ende nuk është caktuar, tha zëdhënësi i kryeministrit, Omer Dostri, për CNN.
Netanyahu përballet me një zgjedhje të vështirë: t’u dorëzohet kërkesave të ekstremistëve të djathtë për t’u rikthyer në luftë pas 42 ditësh armëpushim ose të pranojë mbështetjen e opozitës politike duke u dhënë atyre të drejtën e vetos për të ardhmen e tij në detyrë.
Qeveria izraelite ka shtyrë votimin për miratimin e armëpushimit të shpallur të mërkurën. Thuhet se arsyeja është se Hamasi ka shtuar disa kërkesa në minutën e fundit, për të cilat CNN mëson se lidhen me shqetësimin se cilët të burgosur palestinezë do të lirohen nga burgu izraelit. Një zëdhënës i Hamasit tha se grupi është “i përkushtuar ndaj marrëveshjes për armëpushim të shpallur nga ndërmjetësit”.
Në sfond, një valë aktivitetesh rrethon ministrin ultranacionalist të Financave, Bezalel Smotrich, partia e vogël Zioniste Fetare e të cilit është kyçe për aftësinë e Netanyahu-t për të qeverisur.
Të enjten, partia tha se si kusht për mbështetjen e marrëveshjes për armëpushim, Netanyahu duhet të angazhohet për rinisjen e luftës pas 42 ditësh, sapo të përfundojë faza e parë e armëpushimit. Nëse ai nuk e bën këtë, partia tha se do të largohet nga koalicioni qeverisës. Nëse Netanyahu angazhohet për të rinisur luftën pas 42 ditësh dhe kjo bëhet publike, kjo mund të shembë marrëveshjen përpara se të fillojë dhe të shkaktojë zemërimin e presidentit të ardhshëm amerikan, Donald Trump, i cili e ka mbështetur marrëveshjen si një sukses të tijin.
Kjo mund të bëjë që Netanyahu të humbasë shumicën në Knesset, parlamentin izraelit. Por kjo nuk do të thotë se qeveria e tij do të bjerë, pasi opozitari Yair Lapid, nga partia Yesh Atid, ka deklaruar se do t’i ofronte kryeministrit një litar shpëtimi, duke i premtuar mbështetje për “një periudhë të caktuar”.
Kjo do të thotë që Lapid do të mbante një shpatë mbi qafën e Netanyahu-t dhe mund të rrëzonte qeverinë dhe të shpallte zgjedhje kurdo që të dëshironte.
“Është befasuese për mua që duket se kryeministri – magjistari, politikani kryesor – ka bërë një llogaritje të gabuar,” tha Aaron David Miller, një negociator me përvojë amerikan, për CNN të enjten.
