Kryeministri izraelit Benjamin Netanyahu do të mbajë sot një mbledhje të qeverisë. Kjo mbledhje organizohet në një moment kur liderët izraelitë po peshojnë se çfarë përgjigje do t’i japin Iranit pas sulmit të kryer ndaj Izraelit më 1 tetor.
Informacionin për mbledhjen e sotme e ka konfirmuar për CNN një zyrtar izraelit që dëshiron të mbetet anonim.
Izraeli ka intensifikuar operacionet e tij ushtarake në Gaza, duke dhënë urdhra për evakuim dhe duke bllokuar furnizimin me ushqime të enklavës së varfëruar.
Tensionet vazhdojnë të ziejnë përgjatë kufirit midis Izraelit dhe Libanit, ndërsa dhjetëra vende dënojnë sulmet ndaj forcave paqeruajtëse të Kombeve të Bashkuara (OKB).
Një e katërta e territorit libanez është nën urdhrin për evakuim për shkak të sulmeve ajrore izraelite dhe depërtimit të trupave tokësore.
Operacionet ushtarake izraelite që po zgjerohen në Gaza dhe Liban, si dhe përgjigja e ardhshme ndaj sulmit raketor të Iranit, janë dëshmi e nevojës së Netanyahut për mbijetesë politike, tha një ish-diplomat izraelit për CNN.
“Netanyahu nuk dëshiron ta përfundojë luftën,” tha Alon Pinkas, ish-konsull i përgjithshëm i Izraelit në New York.
Më 1 tetor, Irani filloi një sulm me rreth 180 raketa si hakmarrje për vrasjen e ish-shefit të byrosë politike të Hamasit, Ismail Haniyeh, në Teheran, liderit të Hezbollahut, Hassan Nasrallah, dhe kreut të Gardës Revolucionare, Abbas Nilforushan.
