Trendi në rritje i numrit të futbollistëve të lënduar në botën e futbollit po bëhet një problem serioz, dhe këtë e tregojnë më së miri shifrat që vijnë nga Premier Liga angleze.
Ndër të gjitha lëndimet, veçanërisht bie në sy dëmtimi i pjesës së pasme të kofshës (hamstring), i cili sipas statistikave është shkaku kryesor i mungesës së futbollistëve në fushë. Ky numër po rritet nga viti në vit.
Sezonin e kaluar, vetëm nga dëmtimi i pjesës së pasme të kofshës u dëmtuan 163 futbollistë në Premier Ligë – shifër rekorde. Këtë sezon, ky rekord mund të tejkalohet.
Mbrëmë u regjistrua futbollisti i 119-të këtë sezon që pësoi dëmtim në atë zonë – bëhet fjalë për mbrojtësin e shkëlqyer të Arsenalit, Gabriel Magalhães, i cili u lëndua në ndeshjen kundër Fulhamit.
Parashikimet për Gabrielin janë të këqija – nga klubi është konfirmuar se nuk do të kthehet më në fushë këtë sezon. Më parë, dëmtime të ndryshme kanë “gërryer” ekipin e Arsenalit në momentet kyçe të luftës për titull.
Mesatarisht, në çdo xhiro të Premier Ligës këtë sezon janë lënduar katër futbollistë nga pjesa e pasme e kofshës – një statistikë vërtet alarmante. Zgjidhja, duket, ende nuk është gjetur.
Lëndimi i pjesës së pasme të kofshës mund të jetë kontuzion muskulor, tendosje apo këputje e muskulit. Është një dëmtim akut sportiv që nuk përfshin kontakt fizik me një trup tjetër. Sportistët janë veçanërisht të rrezikuar në sportet që përfshijnë përshpejtim të shpejtë, si futbolli apo atletika.
