Futbollisti ukrainas Mihajlo Mudrik do të bëhet lojtar i ri i Chelseat pas një kthese të pabesueshme në orët e fundit, kur blutë e mposhtën ofertën e Arsenalit dhe e kapën këtë anësor mu nën hundë.
Sipas The Athletic, Chelsea ka rënë dakord sot në Poloni për transferimin e këtij lojtari me vlerë 100 milionë euro dhe tashmë lojtari është duke u nisur nga Turqia për në Londër, ku janë planifikuar ekzaminimet mjekësore dhe ku së shpejti do të nënshkruajë për një klub të ri.
Arsenali prej muajsh po punon aktivisht për ta sjellë këtë lojtar dhe pas dy të parëve, sot iu refuzua një ofertë e tretë, po ashtu afër 100 milionë euro me bonuse, ndaj në fund ky anësor do të përfundojë në Stamford Bridge, megjithëse të gjithë e kanë parë tashmë në Emirates.
Ky është padyshim transferimi më i shtrenjtë në afatin kalimtar dimëror dhe nuk ka dyshim se tifozët e Arsenalit do të zemërohen me këtë lojtar, por edhe me drejtuesit e klubit të tyre që lejuan rivalin e madh të qytetit t’i grabisë një përforcim të madh.
Mudrik konsiderohet si një nga talentet më të mëdhenj në Evropë dhe sot ka marrë çmimin për lojtarin më të mirë të Shakhtarit në vitin 2022.
