Gjykata e Lartë e Nepalit vendosi dje të lirojë nga burgu vrasësin serial famëkeq francez Charles Sobhraj, i cili ishte frymëzimi i serialit televiziv “Gjarpri”.
Zëdhënësi i gjykatës Bimal Paudel tha se ky vendim është marrë duke marrë parasysh moshën dhe shëndetin e Sobhraj. 78-vjeçari u dënua me burgim të përjetshëm dhe e kreu dënimin në Bhaktapur, një periferi e Katmandu, për vrasjen e dy turistëve në vitin 1975. Megjithatë, shumë vrasje të tjera të dyshuara mbeten të pazbardhura.
Sipas zëdhënëses së gjykatës, trupi gjyqësor i ka kërkuar qeverisë që ta lirojë menjëherë dhe ta deportojë në Francë brenda 15 ditëve. Sipas gjykatës, Sobhraj ka një problem në zemër që kërkon ndërhyrje kirurgjikale.
Ai lindi në Saigon ndërsa Vietnami ishte nën sundimin francez. Ai u burgos për herë të parë në vitin 1963 në Paris për vjedhje, por më vonë u akuzua për krime në një numër vendesh – Francë, Greqi, Turqi, Iran, Afganistan, Pakistan, Nepal, Indi, Tajlandë dhe Malajzi.
Ai u arratis nga burgjet e disa shteteve dhe për shkak të aftësive të tij të arratisjes, ai u mbiquajt Gjarpri.
Sipas autorëve të biografisë së tij, ai rrëfeu se kishte kryer të paktën 12 vrasje nga viti 1972 deri në vitin 1976, por e tërhoqi rrëfimin e tij përpara se të fillonte gjyqi. Numri aktual i viktimave të tij nuk dihet. Në vitin 2014, një gjykatë nepaleze e dënoi atë me 20 vjet burg për vrasjen e turistit kanadez Laurent Carrière.
Bashkëprodhimi i BBC/Netflix i vitit të kaluar “The Serpent” u bazua në vrasjet e supozuara të Sobhraj. Seriali tregon se si ai i shmangej ligjit për vite në të gjithë Azinë, ndërsa drogonte, grabiste dhe vriste turistët, raporton CNN.
