I njohur si “Nostradamus” për aftësinë e tij për të parashikuar me saktësi rezultatet e zgjedhjeve presidenciale amerikane që nga viti 1984, profesori dhe historiani Allan Lichtman ka gabuar vetëm një herë – kur republikani George W. Bush e mundi me një diferencë shumë të ngushtë demokraten Al Gore në vitin 2000.
Demokratja Kamala Harris do të fitojë në zgjedhjet presidenciale amerikane këtë nëntor, parashikon Lichtman.
“Kamala Harris do të jetë presidentja e ardhshme e Shteteve të Bashkuara të Amerikës – të paktën ky është parashikimi im për rezultatin e kësaj gare,” thotë 77-vjeçari për The New York Times.
Lichtman ishte gjithashtu një nga ata që i këshilluan demokratët që t’i lejonin presidentit aktual Joe Biden të kandidonte, edhe pas debatit të dobët me republikanin Donald Trump.
Nuk ndjek opinionin publik
Ky historian amerikan në parashikimet e tij nuk merr parasysh sondazhet e opinionit publik – ai mbështetet ekskluzivisht në 13 pyetje që lidhen me partinë që aktualisht mban Shtëpinë e Bardhë, të cilave u përgjigjet me “po” ose “jo”. Kandidati që mbron mandatin është një nga faktorët që sipas Lichtman i jep përparësi.
Megjithatë, Lichtman pohon se Harris tashmë ka avantazh në tetë nga 13 kriteret që ai ndjek. Ndër të tjera, demokratët përfitojnë nga mungesa e një kandidati të tretë të rëndësishëm pas tërheqjes së Robert F. Kennedy të riut, treguesit ekonomikë pozitivë në periudhën afatshkurtër dhe afatgjatë, disa suksese legjislative të administratës demokratike, si dhe mungesa e trazirave të mëdha sociale apo skandaleve të lidhura me Shtëpinë e Bardhë.
Harris përfitoi gjithashtu nga fakti që nuk iu desh të kalonte nëpër një betejë brenda partisë për nominimin, pasi Partia Demokratike u bashkua shpejt pas saj pas tërheqjes së Biden nga zgjedhjet.
Sipas Lichtman, pasiguria më e madhe qëndron në dy kritere që lidhen me sukseset ose dështimet e politikës së jashtme dhe ushtarake të administratës aktuale.
“A mund të ndryshojnë gjërat ende? Sigurisht. Nuk mund të parashikoj se çfarë do të ndodhë në botë dhe kemi dy konflikte lufte të paparashikueshme,” tha Lichtman për agjencinë Reuters.
Edhe nëse të dy kriteret janë të pafavorshme për Harris, Trump do të kishte përparësi vetëm në pesë kritere. Për të mposhtur partinë në pushtet sipas metodës së Lichtman, kandidati i opozitës duhet të ketë përparësi në të paktën gjashtë kritere.
Çudia ndaj kritereve
Shumë përdorues të rrjetit social X shprehën mospajtim me vlerësimin e kritereve nga Lichtman, veçanërisht për vlerësimin pozitiv të ekonomisë në një kohë kur shumë amerikanë në sondazhe shprehin mendime të kundërta.
Po ashtu, disa u shprehën të habitur me pretendimin për mungesën e skandaleve rreth Shtëpisë së Bardhë, duke pasur parasysh proceset gjyqësore kundër djalit të presidentit, Hunter Biden, për akuzat për shkelje tatimore dhe posedim të paligjshëm të armëve gjatë kohës që ishte i varur nga droga.
Megjithatë, Lichtman ka një përqindje shumë të ulët gabimesh në parashikimet e tij. Ndër të tjera, ai parashikoi fitoren e Trump ndaj Hillary Clinton në vitin 2016, pavarësisht se shumica e sondazheve nuk e treguan këtë. Ai gjithashtu parashikoi saktësisht që Trump do të shkarkohej gjatë mandatit të tij.
Profesori i historisë në Universitetin Amerikan në Uashington ka parashikuar rezultatet e zgjedhjeve presidenciale amerikane që nga viti 1984, dhe ka gabuar vetëm një herë – në fitoren e ngushtë të George W. Bush ndaj Al Gore në vitin 2000, për të cilën vendosi përfundimisht Gjykata e Lartë e SHBA-së.
13 kriteret e Lichtman janë:
Fitorja në zgjedhjet e mesmandatit (zgjedhjet për Kongres që mbahen në mes të mandatit presidencial)
Pa kandidat kundërshtar nga vetë partia
Kandidati është presidenti aktual që kërkon mandatin e dytë
Nuk ka kandidat të tretë të rëndësishëm
Gjendje e mirë ekonomike afatshkurtër
Gjendje e mirë ekonomike afatgjatë (të paktën po aq e mirë sa në dy mandatet e fundit)
Ndryshime të mëdha në politikë
Nuk ka pasur skandal të madh
Nuk ka pasur dështim të huaj ose ushtarak
Ka pasur sukses të madh të huaj ose ushtarak
Nuk ka pasur trazira sociale
Presidenti është karizmatik
Kundërshtari i presidentit nuk është karizmatik
