Sipas raportimeve të New York Times, oficerë amerikanë bashkëpunuan me komandantët ukrainas gjatë operacionit për fundosjen e anijes më të madhe të flotës ruse të Detit të Zi, kryqëzorit raketor “Moskva”.
Pavarësisht bashkëpunimit dhe shkëmbimit të informacionit midis SHBA-së dhe Ukrainës, zyrtarët në Uashington reaguan me zemërim për fundosjen e “Moskva”-s.
Nga ana tjetër, New York Times thekson se në koordinimin dhe planifikimin e operacionit ishin kyç gjenerali ukrainas Mihajlo Zabrodski dhe gjenerali amerikan Christopher Donahue.
Sipas një zyrtari të lartë ushtarak amerikan, oficerë detarë amerikanë dhe ukrainas ndodheshin në një seancë të rregullt të shkëmbimit të të dhënave kur në radar u shfaq një sinjal i papritur.
Amerikanët e identifikuan objektin si kryqëzorin raketor “Moskva”, pas së cilës ukrainasit reaguan me habi pozitive dhe menjëherë nisën sulmin.
Një burim mirë i informuar thotë se anëtarët e delegacionit amerikan ishin të zemëruar dhe të frustruar pas sulmit ukrainas, pasi nuk ishin informuar me kohë për operacionin.
Për më tepër, habi shkaktoi edhe fakti që një anije kaq e rëndësishme u fundos me vetëm dy raketa kundër anijesh të tipit “Neptun”, ekzistenca e të cilave nuk ishte e njohur për oficerët amerikanë.
Forcat ukrainase e fundosën kryqëzorin “Moskva” më 14 prill 2022, ndërsa në momentin e shkatërrimit vlera e anijes vlerësohej rreth 750 milionë dollarë.
