Mjeku ligjor nga Gaza, dr. Ahmed Dhair, ka deklaruar se 14 nga 15 trupat e punonjësve mjekësorë dhe shpëtimtarëve të vrarë në mars nga ushtria izraelite ishin të goditur me plumba në kokë dhe në pjesën e bustit të trupit, përveç plagëve nga eksplozivët. Këto zbulime vijnë pas një incidenti që shkaktoi zemërim ndërkombëtar, kur forcat izraelite sulmuan një konvoj ndihmash të përbërë nga personel i Gjysmëhënës së Kuqe palestineze, mbrojtjes civile dhe punonjës të Kombeve të Bashkuara në Gazën jugore.
Trupat dhe automjetet e tyre të shtypura ishin varrosur nga ushtria izraelite në një varr masiv me rërë. Kombet e Bashkuara kanë pohuar se trupat u ekzekutuan “një nga një”. Pas zhvarrosjes, u zbuluan dëshmi që mund të përforcojnë akuzat për krime lufte.
Dr. Dhair për The Guardian tha se kishte hasur në “çarje, plagë hyrëse të plumbave dhe dëmtime nga eksplozivë” – kryesisht në kraharor, bark, shpinë dhe kokë. Ai përmendi edhe prova për përdorimin e të ashtuquajturve “plumba flutur” (leptir), të cilët shpërthejnë brenda trupit, duke copëtuar inde dhe eshtra.
“Gjetëm mbetje të plumbave shpërthyes. Në një rast, koka e plumbit shpërtheu në kraharor, ndërsa pjesët e mbetura u shpërndanë në trupin e viktimës. Kishte gjithashtu fragmente ose shrapnelë të shpërndarë në shpinë të një prej viktimave,” tha ai.
Ushtria izraelite (IDF) nuk ka komentuar ende mbi akuzat për përdorimin e këtij lloji municioni, që ndalohet sipas disa konventave ndërkombëtare për shkak të dëmtimeve çnjerëzore që shkakton.
Detajet e incidentit mbeten të paqarta. Një video tregon konvojin e ndihmës duke u qëlluar nga forcat izraelite, por nuk dihet ende se si trupat përfunduan të varrosur në një varr masiv. Izraeli fillimisht tha se automjetet ishin “duke lëvizur në mënyrë të dyshimtë” pa drita, por u detyrua të ndryshojë versionin pas paraqitjes së provave kontradiktore.
Izraeli pretendon – pa ofruar prova publike – se gjashtë nga të vrarët ishin operativë të Hamasit. Kjo është mohuar nga Gjysmëhëna e Kuqe.
Dr. Dhair shtoi se, megjithëse nuk gjeti prova të qarta se viktimat ishin qëlluar nga afër, në një rast kishte mavijosje në kyçet e duarve që mund të sugjeronin lidhje me litar. Të gjithë viktimat ishin në uniformat e tyre të punës dhe trupat kishin nisur të dekompozoheshin.
Zbulimet ka të ngjarë të rrisin presionin mbi Izraelin për të dhënë një pasqyrë të plotë të incidentit, veçanërisht përballë akuzave për krime lufte. Hetimi është ende në zhvillim.
Një nga dy punonjësit e mbijetuar, Assad al-Nsasrah, është konfirmuar këtë javë se mbahet në paraburgim nga autoritetet izraelite.
Organizata humanitare Médecins Sans Frontières deklaroi të mërkurën se Gaza po shndërrohet në një “varr masiv për palestinezët”. Ndihmat jetike – ushqim, karburant, ujë dhe ilaçe – janë bllokuar nga Izraeli që nga 2 marsi, më shumë se dy javë para përfundimit të armëpushimit me Hamasin dhe rinisjes së bombardimeve ajrore dhe tokësore.
