Paralajmërimi erdhi pasi Ministria e Shëndetësisë e Libanit konfirmoi rastin e parë të kolerës në veri të vendit, ku Izraeli vazhdon sulmet e tij ajrore dhe tokësore
Përfaqësuesi i Organizatës Botërore të Shëndetësisë (OBSH) në Liban, Abdul Nasir Abubakar, paralajmëroi se rreziku i përhapjes së kolerës është “shumë i lartë” në këtë vend për shkak të zhvendosjeve të reja si rezultat i sulmeve izraelite, raporton Anadolu.
Komentet nga Abubakar erdhën pasi Ministria e Shëndetësisë e Libanit konfirmoi rastin e parë të kolerës në veri të vendit, ku Izraeli vazhdon sulmet e tij ajrore dhe tokësore pavarësisht protestave ndërkombëtare dhe thirrjeve për një armëpushim.
Abubakar tha në një konferencë në Gjenevë se rasti i konfirmuar u raportua në një zonë ku popullata nuk ishte e vaksinuar.
Me ardhjen e njerëzve që u zhvendosën nga konflikti në veri, tha ai, rreziku i transmetimit është “shumë i lartë” pasi ata njerëz nga jugu i Bejrutit nuk kishin imunitet ndaj kolerës për dekadat e fundit.
Ai tha se OBSH-ja po punon ngushtë me Ministrinë e Shëndetësisë dhe partnerë të tjerë për të rritur sasinë e ujit dhe kanalizimeve në zonat me rrezik të lartë.
Shefi i OBSH-së Tedros Adhanom Ghebreyesus tha në të njëjtën konferencë se agjencia ka aktivizuar planin e gatishmërisë dhe reagimit ndaj kolerës për të forcuar mbikëqyrjen dhe gjurmimin e kontakteve, duke përfshirë mbikëqyrjen mjedisore dhe marrjen e mostrave të ujit në vend.
Tedros theksoi se një fushatë e vaksinimit oral të kolerës që synon 350.000 njerëz që jetojnë në zona me rrezik të lartë ishte nisur nga Ministria e Shëndetësisë. Megjithatë, ai u ankua se përshkallëzimi i dhunës ndërpreu fushatën.
Ai tha se që nga përshkallëzimi i sulmeve, OBSH-ja ka verifikuar 23 sulme ndaj kujdesit shëndetësor që kanë çuar në 72 vdekje dhe 43 lëndime mes punonjësve shëndetësorë dhe pacientëve në Liban.
