Misioni i mbikëqyrjes për të drejtat e njeriut i Kombeve të Bashkuara ka regjistruar një “rritje alarmante” të ekzekutimeve të raportuara të ushtarëve ukrainas të kapur nga forcat e armatosura ruse gjatë luftës në muajt e fundit, bëri të ditur misioni të hënën.
Misioni në Ukrainë njoftoi se ka marrë raporte për 79 ekzekutime në 24 incidente të ndara që nga fundi i gushtit të vitit të kaluar. E drejta ndërkombëtare humanitare ndalon ekzekutimin e robërve të luftës dhe të të plagosurve, duke e cilësuar këtë një krim lufte.
“Shumë ushtarë ukrainas që janë dorëzuar ose janë mbajtur në paraburgim nga forcat e armatosura ruse janë vrarë në vend. Dëshmitarët gjithashtu kanë përshkruar vrasje të ushtarëve ukrainas të paarmatosur dhe të plagosur,” thuhet në deklaratën e misionit.
Duke komentuar raportin, ministri i jashtëm ukrainas, Andrij Sibiha, deklaroi se krimet ruse kërkojnë veprime të menjëhershme ndërkombëtare.
“Ekzekutimet e tmerrshme të robërve të luftës ukrainas nga Rusia tregojnë se Ukraina po përballet me përbindësha të vërtetë. Na duhen mjete të reja dhe efektive juridike ndërkombëtare dhe hapa konkretë për të mbajtur përgjegjës autorët e këtyre krimeve,” shkroi ai në platformën e mediave sociale X.
Ministria ruse e mbrojtjes nuk iu përgjigj menjëherë kërkesës për koment.
Trupi i OKB-së ka siguruar dhe analizuar pamje video dhe materiale fotografike të publikuara nga burime ukrainase dhe ruse, të cilat tregojnë ekzekutime dhe trupat e vrarë, si dhe ka kryer intervista të detajuara me dëshmitarë.
Sipas raportit, ekzekutimet e raportuara kanë ndodhur në zona ku operacionet sulmuese ruse ishin në zhvillim.
Danielle Bell, drejtuesja e misionit, tha se disa zyrtarë rusë “kanë bërë thirrje të drejtpërdrejta për trajtim çnjerëzor dhe madje edhe për ekzekutimin” e ushtarëve ukrainas të kapur.
Misioni gjithashtu njoftoi se ka dokumentuar një ekzekutim të një ushtari rus të plagosur dhe të paaftë nga forcat e armatosura ukrainase në vitin 2024, por nuk dha detaje të mëtejshme.
Prokuroria ukrainase më herët njoftoi se po heton dhjetëra raste të ekzekutimeve të personelit ushtarak ukrainas nga forcat ruse, raporton Reuters.
