Fondacioni Hind Rajab (HRF) ka njoftuar se do të ndërmarrë veprime të menjëhershme ligjore kundër vizitës së planifikuar për nesër të kryeministrit izraelit Benjamin Netanyahu në Hungari.
HRF do të dorëzojë një peticion në Gjykatën Penale Ndërkombëtare dhe do t’i bëjë thirrje prokurorit publik hungarez që të arrestojë Netanyahun, si dhe do të njoftojë autoritetet evropiane të hapësirës ajrore që t’ia ndalojnë kalimin.
“Ekipet juridike në mbarë Evropën po përgatiten gjithashtu që të reagojnë nëse ai udhëton jashtë Hungarisë. HRF u bën thirrje të gjitha shteteve evropiane që të respektojnë të drejtën ndërkombëtare dhe të mos ofrojnë strehim të sigurt për të dyshuar për krime lufte,” thuhet në njoftim.
Organizata joqeveritare me seli në Belgjikë është themeluar para shtatë muajsh dhe ka mbledhur avokatë e aktivistë nga mbarë bota për të përgatitur raste kundër ushtarëve izraelitë, bazuar në përmbajtje të shpërndara nga vetë ushtarët në rrjetet sociale./Gazetaere
