Nisma rajonale Ballkani i Hapur nuk e respekton parimin e përfshirjes dhe nuk i trajton të gjitha vendet në mënyrë të barabartë, ka vlerësuar presidentja e Kosovës Vjosa Osmani.
Në një intervistë për agjencinë MINA, Osmani ka thënë se në Kosovë iniciativën e kanë analizuar nga ana politike, por edhe nga ajo profesionale (eksperte).
Sipas presidentes Osmani, dallimi i madh në mes të Ballkanit të Hapur dhe nismave të tjera është se iniciativat e tjera, por edhe krijuesit e tyre, i trajtojnë të gjitha shtetet si të barabarta.
“Ne jemi për marrëveshje që do ta përshpejtojnë anëtarësimin tonë në Bashkimin Evropian (BE), në vend që të krijohet një pritore që i jep arsye dhe justifikim Unionit që të mos shpejtojë procesin e anëtarësimit”, tha Osmani.
Ajo tha se pa anëtarësimin e Ballkanit Perëndimor në BE nuk mund të ketë Evropë të lirë, të bashkuar dhe paqësore dhe sigurisht që nuk mund të ketë siguri në kontinentin evropian.
“Prandaj, ne ishim shumë të qartë për këtë. Ne i respektojmë vendet e tjera, por në të njëjtën kohë dëshirojmë që të respektohet qëndrimi ynë, sepse është një qëndrim që është shqyrtuar përmes vlerësimeve shumë serioze të të gjithë faktorëve të nevojshëm”, tha Osmani.
Ajo tha se janë të shumta iniciativat në të cilat merr pjesë Kosova, duke shtuar se arsyeja e pjesëmarrjes së tyre është se atje trajtohen si të barabartë, si dhe respektimi i parimit të gjithëpërfshirjes që nga dita e parë.
“Prandaj, të gjashtë vendet e Ballkanit Perëndimor morën pjesë në krijimin e këtyre nismave, për dallim nga Ballkani i Hapur, i cili nuk është gjithëpërfshirës dhe që nuk na trajton në mënyrë të barabartë”, tha Osmani.
E pyetur se si e sheh problemin e demarkacionit të Malit të Zi dhe Kosovës, ajo tha se definitivisht nuk bëhet fjalë për ndonjë problem.
“Për më tepër, besoj se Kosova dhe Mali i Zi kanë arritur në fazën ku çdo diskutim bazohet në parimin e marrëdhënieve të shkëlqyera fqinjësore. Kur mbizotëron ky parim në çdo diskutim, nuk do të thosha kurrë se gjërat që diskutohen janë problem. Përkundrazi, do të thosha se është një bisedë”, ka shqaruar Osmani.
Osmani kujtoi se Mali i Zi e ka ratifikuar Marrëveshjen në Kuvend shumë vite më parë dhe se Kuvendi i Kosovës ka ratifikuar tre dokumente, gjegjësisht vetë Marrëveshjen, deklaratat e presidentëve të Kosovës dhe Malit të Zi dhe i treti, që është produkt i punës së komisionit.
“Pra, është komisioni teknik dhe ekspertët ata që duhet ta marrin përsipër punën dhe tani ekspertët duhet të përcaktojnë hapat e ardhshëm, në vend që politikanët të bëjnë deklarata që mund të dëmtojnë vetëm progresin”, tha Osmani.
Sipas vlerësimit të saj, synimi i Rusisë nuk është vetëm të shkatërrojë sovranitetin dhe integritetin territorial të Ukrainës, por edhe të luftojë kundër sistemeve të bazuara në vlera dhe mënyrës së jetesës demokratike.
Ajo tha se Bashkimi Evropian duhet t’i dërgojë një mesazh shumë të qartë Serbisë se nëse vazhdon në atë rrugë, negociatat e anëtarësimit do të pezullohen.
“Vendi im nuk ka parë kurrë opsione të tjera. Këtë e kemi parë jo vetëm si këndvështrim të popullit të Kosovës, por si vizion të çdo qeverie dhe institucioni që e ka udhëhequr vendin deri më tani”, tha Osmani.
Sipas Osmanit, është koha që Kosovës dhe Bosnjë e Hercegovinës t’i ofrohet një rrugë e qartë dhe e përshpejtuar drejt NATO-s.
Siç theksoj ajo, Kosova ka formuar një grup punues ndërinstitucional, i cili i kalon nëpër të gjitha kriteret e aplikimit dhe procedurat, për të përcaktuar kohën më të mirë për të aplikuar zyrtarisht për anëtarësim në NATO.
Ajo tha se rruga drejt anëtarësimit në NATO kalon edhe përmes Partneritetit për Paqe, që është hapi i parë për në të cilin Kosovën duhet të punojnë.
E pyetur se çfarë reagimi pret nga Beogradi zyrtar kur Kosova të dorëzojë zyrtarisht kërkesën për anëtarësim në NATO, ajo tha se ata kurrë nuk do ta kishin shpallur pavarësinë, po të kishin shikuar reagimet e Serbisë.
Ajo tha se anëtarësimi i Kosovës në ato organizata nuk paraqet vetëm veprime politike, duke shtuar se qytetarët kanë përfitimin përfundimtar.
Siç ka vlerësuar ajo, të thuash “Jo” anëtarësimit të Kosovës në Këshillin e Evropës do të thotë të thuash “Jo” për një standard më të lartë të të drejtave të njeriut në Evropë, sepse Kosova është pjesë e kontinentit.
Ajo tha se kjo vlen edhe për organizatat tjera ndërkombëtare, duke shtuar se kur Kosova të jetë e gatshme të aplikojë për anëtarësim në NATO, reagimi i Serbisë është padyshim diçka për t’u kushtuar vëmendje.