Dronët e ushtrisë turke kanë regjistruar dislokimin grek të automjeteve të blinduara në ishujt e Egjeut me status joushtarak.
Dronët e ushtrisë turke kanë regjistruar dislokimin grek të automjeteve të blinduara në ishujt e Egjeut me status joushtarak, në kundërshtim me ligjin ndërkombëtar, raporton Anadolu Agency (AA).
Pamjet treguan anijet zbarkuese duke bartur automjete ushtarake të dhuruara nga SHBA-ja në ishujt Midilli (Lesvos) dhe Sisam (Samos).
Sipas burimeve të sigurisë, dronët e Forcave të Armatosura Turke që kryenin mision fluturimi mbi detin Egje, regjistruan dy anije zbarkuese greke në rrugë për në Midilli dhe Sisam.
U zbulua se anijet transportonin 23 automjete të blinduara taktike me rrota në Midilli dhe 18 në Sisam, ishuj me status joushtarak. Mjetet e blinduara ishin ndër ato të dërguara nga SHBA-ja në Portin e Aleksandropolisit (Dedeağaç) të Greqisë.
– “Të papranueshme”
Sipas burimeve të sigurisë, veprimet greke më 18 dhe 21 shtator janë një dëshmi e qartë e militarizimit të vazhdueshëm të ishujve pranë Türkiye-s dhe shkeljes së statusit të tyre joushtarak.
Ata thanë se Greqia vendos armë të dhuruara veçanërisht nga SHBA-ja në ishujt me status joushtarak, duke i zëvendësuar ato me disa automjete në ishuj.
Aktet e Athinës kundër ligjit ndërkombëtar dhe frymës së aleancës, pavarësisht thirrjeve për dialog dhe lidhje të mira fqinjësore, janë “të papranueshme”, thanë burimet e sigurisë.
Ata kujtuan gjithashtu përpjekjet e Turqisë për të zgjidhur problemet me dialog dhe sipas ligjit ndërkombëtar, si dhe thirrjet e Ankarasë për takime për të diskutuar çështjet.
“Fakti që Greqia nuk merr pjesë as në mbledhje, pavarësisht ftesave dhe bën provokime të tilla, tregon se kush rrit tensionet, kush është i papajtueshëm, agresiv dhe i paligjshëm”, thanë burimet.