Ndërsa pritjet vazhdojnë për një armëpushim midis Izraelit dhe Hezbollahut, ushtria izraelite ka lëshuar paralajmërime të reja për sulme kundër Bejrutit
Banorët e kryeqytetit të Libanit, Bejrut, kanë dalë në rrugë për shkak të kërcënimit të ushtrisë izraelite për sulme ajrore përpara një armëpushimi të mundshëm, raporton Anadolu.
Ndërsa pritjet vazhdojnë për një armëpushim midis Izraelit dhe Hezbollahut, ushtria izraelite ka lëshuar paralajmërime të reja për sulme kundër Bejrutit.
Në një deklaratë në llogarinë e tij në rrjetet sociale, zëdhënësi i ushtrisë Avichay Adraee deklaroi se filialet e institucionit Qard al-Hasan të Hezbollahut, i cili ka degë në shumë zona të Bejrutit, gjithashtu do të jenë në shënjestër.
Pas kësaj deklarate, qindra njerëz u larguan nga shtëpitë e tyre në qytet nga shqetësimi se Izraeli do të kryejë sulme ajrore në shumë pjesë të Bejrutit.
Banorët e kryeqytetit libanez dolën në rrugë në errësirën e natës dhe u zhvendosën drejt zonave që i konsiderojnë “më të sigurta”.
Ndërsa trafiku u ndërpre në shumë pjesë të qytetit për shkak të dendësisë së automjeteve, shumë njerëz u larguan në këmbë nga zonat që mendohej se do të jenë objektiv i sulmeve.
Kabineti izraelit i sigurisë u mblodh sot në mbrëmje për të votuar për një armëpushim të mundshëm.
Nga ana tjetër, televizioni libanez Al-Jadeed tha se armëpushimi i mundshëm do të shpallet me një deklaratë të përbashkët nga SHBA-ja dhe Franca në orët e mbrëmjes.
Mediat raportojnë se armëpushimi do të hyjë në fuqi nesër në mëngjes.
