Ministri i Mbrojtjes së Turqisë, Yaşar Güler, deklaroi se Izraeli mund të sulmojë Turqinë, duke mbështetur deklaratat e mëparshme të presidentit Erdoğan, i cili e përshkroi Izraelin si një kërcënim të drejtpërdrejtë për vendin.
“Izraeli është një shtet agresiv; mund të na sulmojë,” tha ministri, duke nënkuptuar mundësinë e shpërthimit të Luftës së Tretë Botërore në çdo moment.
Duke folur drejtpërdrejt për një televizion informativ turk, ministri Güler theksoi se Turqia duhet të jetë e përgatitur për çdo skenar.
Kur u pyet nëse Izraeli mund të jetë një kërcënim i drejtpërdrejtë për Turqinë, Güler u përgjigj: “Presidenti ynë paralajmëron shoqërinë sepse e sheh këtë rrezik. A do ta shprehte këtë shqetësim zoti president nëse nuk do të shihte një kërcënim të mundshëm nga Izraeli?”
Güler bëri paralele historike, duke kujtuar se luftërat botërore të mëparshme filluan nga ngjarje të vogla, duke paralajmëruar se konflikti mund të shpërthejë papritur.
“Natyrisht, ne nuk duam luftë, por gjithmonë duhet të jemi të përgatitur,” tha ministri gjatë deklaratave të tij.
Ministri i Mbrojtjes theksoi se prioriteti i Turqisë është ruajtja e paqes, por shtoi se forcat e sigurisë së vendit po përgatisin plane të hollësishme për çdo kërcënim të mundshëm.
Deklaratat e Güler vijnë në mes të tensioneve të rritura rajonale, ndërsa operacionet ushtarake izraelite në Gaza dhe Liban po ngjallin shqetësime të gjera në të gjithë Lindjen e Mesme.
