Parisi do të marrë një përmendore të re në fillim të korrikut, të dedikuar viktimave të gjenocidit në Srebrenicë.
Zbulimi zyrtar është planifikuar për 11 korrik, në ditën e 30-vjetorit të gjenocidit që ndodhi në dhe rreth Srebrenicës në korrik të vitit 1995.
Kjo nismë vjen një vit pas miratimit të Rezolutës për Srebrenicën, e cila ishte arsyeja vendimtare që autoritetet e kryeqytetit francez dhanë miratimin për ndërtimin e përmendores, me nismën e Shoqatës “Solidariteti Ndërkombëtar BiH – Francë” (SIBH-France), ka konfirmuar për Detektor kryetari i kësaj shoqate, Jacques-Olivier David.
Iniciativa për ndërtimin e përmendores ishte paraqitur që në vitin 2022.
Që nga viti 2016 në Paris ekziston një rrugë me emrin “Srebrenica”, e shënuar me një pllakë që tregon për krimin që ndodhi në këtë qytet në korrik të vitit 1995, ndërsa ideja për ndërtimin e një përmendoreje lindi pasi organizatorët e përkujtimit të përvjetorit të gjenocidit në Paris prej vitesh i kanë bërë me dije autoriteteve se vendi i mëparshëm i përkujtimit nuk ishte i përshtatshëm dhe i denjë për të nderuar viktimat.
Pas lobimit shumëvjeçar dhe bisedave me përfaqësuesit e autoriteteve, si dhe kërkimit të mbështetjes nga shoqata të tjera të ngjashme, SIBH-France mori lejen për ndërtimin e përmendores në një varrezë të njohur. Çdo vit, kjo varrezë vizitohet nga më shumë se tre milionë turistë për shkak të shumë përmendoreve që ndodhen aty, por edhe për faktin se aty janë varrosur shkrimtarë dhe artistë të njohur.
Përmendorja për viktimat e gjenocidit në Srebrenicë do të ndërtohet pranë përmendores kushtuar viktimave të gjenocidit në Ruandë të kryer në vitin 1994, kur në atë vend u vranë rreth 800.000 njerëz, si dhe përmendoreve të tjera, si ajo në nder të ushtarëve francezë të rënë gjatë Luftës së Dytë Botërore.
