Pas hyrjes në fuqi të marrëveshjes së armëpushimit midis Izraelit dhe Hamasit, kamionët me ndihma humanitare kanë filluar të hyjnë në Gaza nga Pika Kufitare Rafah në anën egjiptiane. Sipas raportimeve të transmetuara nga kanali egjiptian “El-Kahire el-İhbariye”, thuhet se kamionët me ndihma humanitare që po prisnin në Pika Kufitare Rafah kanë filluar të hyjnë në Rripin e Gazës.
Burime palestineze raportuan se 95 kamionë ndihmash që mbërritën në Pikën Kufitare Kerem Abu Salim po prisnin hyrjen në Gaza deri sa armëpushimi të hynte në fuqi. Gjithashtu, Agjencia e Kombeve të Bashkuara për Ndihmën dhe Punët e Refugjatëve Palestinezë në Lindjen e Afërt (UNRWA) njoftoi se 4,000 kamionë të mbushur me ndihma humanitare ishin gati për të hyrë në Gaza.
Ndërkohë që pritej që marrëveshja për armëpushimin dhe shkëmbimin e të burgosurve të arritur midis Hamasit dhe Izraelit të hynte në fuqi në orën 09:30 sipas orës lokale, qeveria e Tel Avivit njoftoi se armëpushimi nuk do të zbatohej deri sa të jepeshin emrat e tre të burgosurve që do të dorëzoheshin.
