Të paktën 270 persona janë vrarë dhe 2.600 të tjerë janë plagosur në përleshjet e armatosura midis ushtrisë dhe luftëtarëve të RSF-së që nga e shtuna në Khartum dhe zonat përreth
Një zjarr masiv shpërtheu në aeroportin e Khartumit sot në vazhdën e përleshjeve midis ushtrisë sudaneze dhe Forcave paraushtarake të Mbështetjes së Shpejtë (RSF), thanë dëshmitarët, transmeton Anadolu.
Sipas dëshmitarëve, zjarri shpërtheu pasi një predhë artilerie goditi cisternat e karburantit të avionëve në aeroport, duke shkaktuar shpërthim.
“Shpërthimi ishte i madh. Nuk ka ekipe zjarrfikëse për të shuar flakët”, tha një dëshmitar okular për Anadolu.
Nuk ka ende asnjë koment nga autoritetet e aeroportit për incidentin.
Të paktën 270 persona janë vrarë dhe 2.600 të tjerë janë plagosur në përleshjet e armatosura midis ushtrisë dhe luftëtarëve të formacionit paraushtarak RSF që nga e shtuna në Khartum dhe zonat përreth, sipas Ministrisë së Shëndetësisë.
Ndërsa RSF-ja akuzoi ushtrinë se kishte sulmuar forcat e saj në jug të Khartumit me armë të lehta dhe të rënda, ushtria tha se forca paraushtarake po “përhap gënjeshtra” dhe e shpalli atë grup “rebel”.
Një mosmarrëveshje midis ushtrisë dhe RSF-së në lidhje me reformën e sigurisë ushtarake, e cila parashikon “pjesëmarrjen e plotë të RSF-së në ushtri”, shkaktoi rritje të tensioneve muajt e fundit.
Mosmarrëveshja midis dy palëve doli në sipërfaqe javën e kaluar, kur ushtria tha se veprimet e fundit nga RSF-ja kanë ndodhur pa koordinim dhe ishin të paligjshme.
Sudani ka qenë pa një qeveri funksionale që nga tetori i vitit 2021, kur ushtria shkarkoi qeverinë kalimtare të kryeministrit Abdalla Hamdok dhe shpalli gjendjen e jashtëzakonshme, hap ky i cilësuar nga forcat politike si “grusht shteti”.
Periudha e tranzicionit në Sudan, e cila filloi në gusht 2019, ishte planifikuar të përfundonte me zgjedhje në fillim të vitit 2024.
