Ish-presidenti i FIFA-s, Sepp Blatter (88 vjeç), dhe legjenda e futbollit francez e ndërkombëtar, si dhe ish-presidenti i UEFA-s, Michel Platini (69), janë shpallur të pafajshëm për akuzat për korrupsion nga një gjykatë zvicerane në Muttenz, pranë Baselit.
Gati tre vite pas vendimit të parë të pafajësisë, Blatter dhe Platini u rikthyen në gjyq përmes një procesi apelimi – dhe edhe kësaj here u liruan nga të gjitha akuzat.
Gjykata zvicerane në korrik 2022 kishte vendosur që të dy të ishin të pafajshëm në lidhje me një pagesë prej 2 milionë frangash zvicerane që FIFA i kishte bërë Platinisë në vitin 2011 me miratimin e Blatterit.
Prokuroria pretendonte se kjo pagesë ishte e paligjshme dhe përbënte mashtrim, por gjykata vlerësoi se nuk kishte prova të mjaftueshme për të mbështetur këtë akuzë.
“Dhjetë vite ndjekje nga FIFA dhe disa prokurorë zviceranë tani kanë përfunduar. Tashmë gjithçka ka marrë fund. Sot më është kthyer nderi dhe jam shumë i lumtur”, deklaroi Platini, duke shtuar se beson se i gjithë rasti kishte për qëllim ta largonte nga gara për president të FIFA-s.
“Kam marrë mbi 10.000 mesazhe mbështetjeje, por tani jam shumë i moshuar për t’u rikthyer në futboll,” shtoi ai.
Kjo gjykim përmbylli një proces të gjatë ligjor që dëmtoi seriozisht karrierat dhe reputacionin e tyre në botën e futbollit.
Pas skandalit, të dy u suspenduan nga aktivitetet futbollistike – Blatter si ish-president i FIFA-s dhe Platini si ish-president i UEFA-s.
