Kryeministri i Kroacisë, Andrej Plenković, ka komentuar deklaratën e presidentit serb, Aleksandar Vuçiq, i cili tha se Kroacia, Shqipëria dhe Kosova kanë shkelur marrëveshjen e vitit 1996 dhe kanë hapur një garë në armatim.
Deklarata për forcimin e bashkëpunimit mbrojtës, e nënshkruar nga Kroacia, Shqipëria dhe Kosova, ka tërhequr vëmendje të madhe në Serbi.
“Shpresoj që dikush të marrë pesë minuta për të lexuar tekstin e marrëveshjes mes Kroacisë, Shqipërisë dhe Kosovës,” tha Plenković, duke shtuar se bëhet fjalë për marrëveshje të zakonshme.
Ai gjithashtu theksoi se Kroacia nuk ka asnjë qëllim armiqësor në këtë proces.
“Ne ishim në pozicionin për të krijuar një dokument që ndihmon përpjekjet e tyre në reforma. Ai nuk ka një karakter armiqësor. E kuptoj që gjithmonë kërkohet një armik diku tjetër, por kjo nuk është e natyrës armiqësore. Kroacia për këtë nuk ka nevojë të pyesë askënd, as Serbinë, as NATO-n,” theksoi Plenković.
