Policia në Finlandë ka njoftuar se djegia publike e librit të shenjtë të Islamit, Kuranit, nuk do të lejohet në vend, raportojnë mediat lokale. Ky vendim është në kundërshtim me qëndrimin e autoriteteve suedeze, të cilët e cilësuan djegien si liri të fjalës.
Departamenti i policisë së shtetit tha se djegia e një kopje të Kuranit do të cenonte paqen fetare, e cila është një vepër e dënueshme në Finlandë, raportoi media, duke cituar agjencinë finlandeze të lajmeve STT.
Djegia publike ose përdhosje tjetër e një libri që konsiderohet i shenjtë nga komuniteti fetar do të shkaktojë një ndërhyrje, shtoi policia.
Në të njëjtën kohë, Ministria e Punëve të Jashtme suedeze përsëriti qëndrimin e saj për djegien e një kopje të Kuranit në emër të lirisë së shprehjes.
“Qeveria i kupton ata që ofendohen nga veprime të tilla si djegia e shkrimeve të shenjta. Jo çdo gjë që është e ligjshme është e nevojshme dhe e përshtatshme,” tha ministria suedeze.
Politikani danezo-suedez Rasmus Paludan, lider i partisë së ekstremit të djathtë Stram Kurs (Linja e fortë), dogji një kopje të Kuranit përpara një xhamie në Danimarkë të premten.
Akti islamofobik erdhi disa ditë pasi lideri i ekstremit të djathtë dogji një Kuran jashtë ambasadës turke në Suedi gjatë një demonstrate të sanksionuar nga policia.
Paludan njoftoi gjithashtu se do të djegë një kopje të librit të shenjtë mysliman çdo të premte derisa Suedia të përfshihet në aleancën e NATO-s.
Ndërkohë, Ministri i Jashtëm turk Mevlut Cavusoglu tha të hënën se Turqia mund të ketë një qasje të ndryshme ndaj ofertës së Finlandës në NATO sesa Suedia.
“Nëse NATO dhe këto vende (Finlanda dhe Suedia) marrin një vendim të tillë, ne si Turqi mendojmë se mund t’i vlerësojmë aplikimet veç e veç, por para së gjithash NATO dhe këto vende duhet të vendosin”, tha Cavusoglu në një konferencë të përbashkët shtypi.
“Unë mendoj se do të ishte e drejtë të bëhej dallimi midis një vendi të trazuar dhe një vendi më pak të trazuar,” shtoi Cavusoglu.
